نارتاي ارالباي: ەربايانعا, بارلىق ساربازعا قاتىستى تەرگەۋ ءادىل ءوتىپ, قوعامعا اشىق جەتكىزىلۋ كەرەك

فوتو: ءماجىلىستىڭ ءباسپاسوز قىزمەتى

جاۋاپتىلار «ەربايان دارەتحاناعا قۇلاپ, جاراقاتتاندى» دەيدى. بۇعان كىم سەنەدى? جاراقاتتىڭ سالدارىنان ساربازدىڭ باسىنىڭ جارتىسىن الىپ تاستاۋعا تۋرا كەلگەن. ەندى وعان تۇراقتى كۇتىم قاجەت. 7 قىركۇيەك كۇنى اقتاۋداعى گورنيزوندا سارباز مارات بارقۇلوۆ ەسىمدى باۋىرىمىز كوز جۇمدى. ونى وفيتسەر اتىپ جىبەرگەن.

ءماجىلىس دەپۋتاتى نارتاي سارسەنعاليەۆ اسكەردەگى الىمجەتتىك تۋرالى ايتىپ, دابىل قاقتى. ونىڭ ايتۋىنشا, سوڭعى ءۇش جىلدا 20 اسكەري ادام ءوز-وزىنە قول سالۋعا وقتالعان, دەپ حابارلايدى qandastar.kz   Skifnews.kz اقپارات پورتالىنا سىلتەمە جاساپ.

«سوڭعى ءۇش جىلدا قازاقستاندا 270 اسكەري قىزمەتكەر قايتىس بولعان, ال سوڭعى ءتورت جىلدا اسكەردە 86 سۋيتسيد تىركەلگەن, 20 اسكەري ادام ءوز-وزىنە قول سالۋعا وقتالعان. بۇل – اسكەري پروكۋراتۋرا مالىمدەگەن رەسمي سان. 2023 جىلعى تامىزدا اسكەري بولىمشەلەردىڭ بىرىندە كوماندير اسكەرگە جاڭادان كەلگەن ساربازدى ورىندىقپەن ۇرىپ, سوققىعا جىققان. 2024 جىلدىڭ ماۋسىم ايىندا جامبىل وبلىسىنىڭ ءبىر اسكەري بولىمشەسىندە اسكەرگە كەلگەنىنە 1 اي بولعان سارباز ەس-ءتۇسسىز جانساقتاۋ بولىمىنە تۇسكەن. ال تاياۋدا بولعان جاعداي بۇكىل وتانداسىمىزدىڭ اشۋ-ىزاسىن تۋعىزدى. ۇلتتىق ۇلاننىڭ جاۋىنگەرى ەربايان مۇحتار باسىنان العان جاراسىنان بەس اي بويى ەس-ءتۇسسىز جاتتى. جاۋاپتىلار «ەربايان دارەتحاناعا قۇلاپ, جاراقاتتاندى» دەيدى. بۇعان كىم سەنەدى? جاراقاتتىڭ سالدارىنان ساربازدىڭ باسىنىڭ جارتىسىن الىپ تاستاۋعا تۋرا كەلگەن. ەندى وعان تۇراقتى كۇتىم قاجەت. 7 قىركۇيەك كۇنى اقتاۋداعى گورنيزوندا سارباز مارات بارقۇلوۆ ەسىمدى باۋىرىمىز كوز جۇمدى. ونى وفيتسەر اتىپ جىبەرگەن. بۇل قاساقانا جاسالعان ارەكەت, جوق پا? اتالعان سۇراقتىڭ جاۋابىن تەرگەۋ ورىندارى ءادىل زەرتتەپ, ناتيجەسىن قوعامعا اشىق تۇردە جەتكىزۋى كەرەك», – دەدى ن.ارالباي ۇلى ءماجىلىستىڭ جالپى وتىرىسىندا قورعانىس ءمينيسترى رۋسلان جاقسىلىقوۆتىڭ اتىنا جولداعان ساۋالىندا.