«ناتسيست, فاشيست»: الماتىدا كافە يەسى قازاقشا ءمازىر تالاپ ەتكەن ەر ادامدى قورلاعان

كۇنى كەشە الماتىداعى «براتسكي شاشلىك» كافەسىندە قازاقشا ءمازىر سۇراعان تۇتىنۋشىعا 2گيس قوسىمشاسىندا مەكەمە وكىلى «ناتسيست», «فاشيست» دەپ پىكىر قالدىرعان. ارتىنشا پىكىرىن ءوشىرىپ, ەر ادامدى بۇعاتتاپ تاستاعان. كافە مەملەكەتتىك تىلدە جاۋاپ بەرۋگە مىندەتتى ەمەس ەكەنىن اشىق مالىمدەگەن. جەلى قولدانۋشىلارى دامحاناعا بويكوت جاريالاپ, قازاقشا ءمازىردى تالاپ ەتۋ زاڭدى قۇقىقتارى ەكەنىن اتاپ ءوتتى, دەپ حابارلايدى qandastar.kz اقپارات پورتالى Stan.kz-كە سىلتەمە جاساپ.

الەۋمەتتىك جەلىدە دوسعالي ءامىروۆ 2گيس قوسىمشاسىندا «براتسكي شاشلىك» كافەسىنەن قازاقشا ءمازىر سۇراپ پىكىر قالدىرعان.

«14 مامىردا الماتىدا اقباقاي كوشەسى 2/سادۋاقاسوۆ كوشەسى 120 قيىلىسىندا ورنالاسقان «براتسكي شاشلىك» دەگەن كافەدە تۇسكى اس ىشتىك. ءمازىر قازاقشا بولمادى. ارتىنان 2گيس كارتاسىندا ءوز پىكىرىمدى قالدىرعان ەدىم. كافەنىڭ جاۋابىنا وزدەرىڭىز باعا بەرىڭىزدەر. ارتىنان ءوشىرىپ تاستاپتى», – دەپ ءتۇسىندىردى دوسعالي ءامىروۆ.

كافە ەر ادامعا «سەن ءبارىن ءتۇسىنىپ تۇرسىڭ عوي, نەگە اقىماق كەيپىن تانىتىپ تۇرسىڭ? ناتسيست, فاشيست. ەگەر پىكىردى وشىرمەسەڭدەر, قوناقتاردى كۇتىڭدەر!» دەپ جاۋاپ بەرگەن.

كافە «سالەمەتسىز بە, ءبىز ءسىزدىڭ تىلىڭىزدە جاۋاپ بەرۋگە مىندەتتىمىز بە, الدە مەملەكەتىمىزدە ونداي زاڭ بار ما?» دەپ پىكىر قالدىرعان. بۇل پايدالانۋشى دا ەندى پوليتسياعا ارىز جازۋدى ويلاپ وتىر. تاعى ءبىر قولدانۋشى بۇل جاعدايعا قوسىلىپ, قازاق تىلىندە پىكىر قالدىرساڭ, 2گيس مودەراتسيادان وتكىزبەيتىنىن, ءارى ولاردىڭ قاي كافە مەن مەيرامحاناعا بارعانىڭ تۋرالى اقپاراتتى سالىق ورگاندارىنا بەرە الاتىنىن ايتىپ, 2گيس-ءتى پايدالانباۋعا كەڭەس بەرگەن.

بۇدان بولەك, كافە TikTok پاراقشاسىندا مەملەكەت باسشىسىنىڭ قاسىم-جومارت توقاەۆتىڭ بۇعان دەيىن ەلىمىزدەگى قوس ءتىلدىڭ قولدانىسىنا قاتىستى مالىمدەسىنىڭ ۆيدەوسىن شىعارعان. الايدا ءبىراز ۋاقىتتان كەيىن ءوشىرىپ تاستاعان.

ارتىنشا «براتسكي شاشلىك» كافەسى رەسمي پاراقشاسىندا قوناقتاردان كەشىرىم سۇراپ, ارقاشان قازاق تىلىنەن قۇرمەتپەن قارايتىندارىن جەتكىزدى.

«قۇرمەتتى قوناقتار! كەلتىرىلگەن قولايسىزدىقتار ءۇشىن شىن كوڭىلمەن كەشىرىم سۇرايمىز. سونىمەن قاتار ءبىزدىڭ اتىمىزدان كىم جاۋاپ بەرىپ جاتقانىن بىلمەگەنىمىزدى اتاپ وتكىمىز كەلەدى. بىراق سىزدەرگە سەندىرگىمىز كەلەدى. بۇل جاعداي ءبىزدىڭ ۇستانىمىمىزعا جانە قۇندىلىقتارىمىزعا مۇلدە ساي كەلمەيدى. ءبىز قازاق تىلىنە ۇلكەن قۇرمەتپەن قارايمىز جانە ونى جوعارى باعالايمىز. بارشا قازاق حالقىنان شىن جۇرەكتەن كەشىرىم سۇرايمىز. ءبىز قازاقستاندى, قازاق ءتىلىن جانە حالقىمىزدىڭ داستۇرلەرىن شىن جۇرەكتەن جاقسى كورەمىز ءارى ەرەكشە قادىرلەيمىز. قىزمەتكەرلەر اراسىنداعى ورىن العان تۇسىنىسپەۋشىلىككە بايلانىستى ءتيىستى شارالار قولدانىلىپ, اتالعان قىزمەتكەر جۇمىستان بوساتىلدى. تاعى دا شىن جۇرەكتەن كەشىرىم سۇراي وتىرىپ, تۇسىنىستىكپەن قاراۋلارىڭىزدى سۇرايمىز», – دەپ جاۋاپ بەردى «براتسكي شاشلىك» كافەسى.