«Naýryz» ıpotekalyq baǵdarlamasy bastaldy

Foto:pixabay.com

5 naýryzdan bastap «Otbasy bankinen» 7-9% mólsherlememen «Naýryz» ıpotekalyq baǵdarlamasyna qatysýǵa ótinimder qabyldaý bastaldy,  dep habarlaıdy qandastar.kz

Baǵdarlamanyń maqsaty – alǵashqy turǵyn úı satyp alý. Baǵdarlamany sońǵy bes jylda jyljymaıtyn múlki joq qazaqstandyqtar paıdalana alady. О́tinimder 31 naýryzǵa deıin Baspana Market portalynda qabyldanady.

Oǵan úı kezeginde turǵan áleýmettik osal top ókilderi, jas otbasylar, turǵyn úı tólemderin alýshylar, «Otbasy bank» salymshylary men monoqalalar, aýdan ortalyqtary men aýyl turǵyndary qatysa alady. Baǵdarlama sharttary boıynsha depozıt merzimi mańyzdy emes, sońǵy 6 aıda resmı tabysy bolýy qajet. Al «Naýryz Jumysker» baǵdarlamasyna ótinish 17 naýryzdan bastap qabyldanady.

Baǵdarlamaǵa qatysý úshin jasy men mártebesi boıynsha shekteý joq.

Qalaı qatysýshy bolý kerek:

1. «Otbasy bankinde» depozıt ashý (eger ol áli joq bolsa). Depozıttiń merzimi mańyzdy emes.

2. Depozıtti 2 mln teńgege deıin toltyryńyz (ótinim berer aldynda barlyq somany salýǵa bolady).

3. Sońǵy 5 jyl ishinde ózinde jáne otbasy múshelerinde (erli-zaıyptylarynda jáne kámeletke tolmaǵan balalarynda) jyljymaıtyn múliktiń bolmaýyna tekserýden ótý.

4. Sońǵy 6 aıda resmı tabystyń bolýyn rastaý.

Baǵdarlamanyń sharttary boıynsha qaryz alýshy bastapqy jarna bolǵan kezde:

10%-dan – taza árleýde turǵyn úı satyp alý;

20%-dan bastap – bastapqy árleýde nemese qaıtalama naryqta turǵyn úı satyp ala alady.

Ipoteka boıynsha mólsherleme:

7% – turǵyn úıge kezekte turǵan halyqtyń áleýmettik osal toptary úshin;

9% – qalǵandary úshin.

Nesıe merzimi – 19 jylǵa deıin. Qaryzdyń eń kóp somasy: Astana men Almatyda 36 mln teńgege deıin, basqa óńirlerde 30 mln teńgege deıin.

17 naýryzdan bastap ónerkásip, energetıka, kólik, aýyl sharýashylyǵy jáne sý resýrstary salalarynyń qyzmetkerleri úshin «Naýryz Jumysker» ıpotekasyna qabyldaý bastalady.