«ناۋرىز» جانە «ناۋرىز جۇمىسكەر» جاڭا تۇرعىن ءۇي باعدارلامالارى قاشان باستالادى?

ءلاززات يبراگيموۆا 5 ناۋرىزدان باستاپ بانك پورتالىندا «ناۋرىز» باعدارلاماسىنا ءوتىنىم قابىلداناتىنىن مالىمدەدى. ونىڭ ايتۋىنشا, وعان بارلىق قازاقستاندىقتار, سونىڭ ىشىندە حالىقتىڭ وسال توپتارىنىڭ وكىلدەرى, جاس وتباسىلار, جۇمىس ىستەيتىن جاستار, تۇرعىن ءۇي تولەمدەرىن الاتىن بانك سالىمشىلارى, سونداي-اق قالالار مەن اۋىلدىق ەلدى مەكەندەردىڭ ەڭبەككە قابىلەتتى حالقى قاتىسا الادى. بۇل رەتتە قاتىسۋشىلاردىڭ رەسمي تابىسى بولۋى ءتيىس.

«17 ناۋرىزدا «ناۋرىز» باعدارلاماسىنىڭ ءبىر بولىگى – «ناۋرىز جۇمىسكەر» باعدارلاماسى ىسكە قوسىلادى. بارلىعى ەكى باعدارلاما قاراستىرىلعان: «ناۋرىز» جانە «ناۋرىز جۇمىسكەر». ولاردىڭ ايىرماشىلىقتارىنا توقتالىپ وتسەم. «ناۋرىز» باعدارلاماسى جاس وتباسىلارعا كوبىرەك باعىتتالعان, وندا بارلىق وتىنىمدەر otbasybank.kz ارنايى پورتالىندا قابىلدانادى, ىرىكتەۋ ۇلكەن كونكۋرس بويىنشا وتەدى. وتىنىمدەردى قابىلداۋ 31 ناۋرىزعا دەيىن جالعاسادى. ىرىكتەۋ كەزىندەگى نەگىزگى كريتەريلەردىڭ بىرقاتارى – سوڭعى 5 جىل ىشىندە تۇرعىن ءۇيدىڭ بولماۋى جانە جيناقتا قاجەتتى سومانىڭ بولۋى», – دەدى ول.

Zakon.kz جازعانداي, جۇمىسشى كادرلارعا ارنالعان يپوتەكالىق باعدارلاماعا قاتىسۋ ءۇشىن وتىنىمدەر بانكتىڭ فيليالدارىندا قابىلدانادى.

«پروتسەسس كەلەسىدەي: قازىرگى ۋاقىتتا جۇمىسشى ماماندىقتارى بويىنشا جۇمىس ىستەيتىن ادامدار باسىمدىققا يە بولادى. وتىنىمدەردى قابىلداۋ ناقتى ۋاقىت رەجيمىندە جۇزەگە اسىرىلادى – كىمدە-كىم ءبىرىنشى بولىپ فيليالعا جۇگىنسە, ءبىرىنشى بولىپ پاتەر تاڭداۋ جانە نەسيە رەسىمدەۋ مۇمكىندىگىن الادى. ءوتىنىم بەرۋ ءۇشىن جۇمىس ورنىنان انىقتاما قاجەت, ونىڭ نەگىزىندە بانك قىزمەتكەرلەرى ۇيىمنىڭ پين-كودىن جانە ونىڭ سالالىق تيەسىلىگىن تەكسەرەدى. ءبىرىنشى كەزەكتە باعدارلاما تاۋ-كەن ءوندىرۋ جانە وڭدەۋ ونەركاسىبىنىڭ بارلىق سالالارىنداعى جۇمىسشى مامانداردى, سونداي-اق ەنەرگەتيكا, كولىك, اۋىل شارۋاشىلىعى جانە سۋ رەسۋرستارى قىزمەتكەرلەرىنە قولداۋ كورسەتەدى», – دەپ ءتۇسىندىردى ءلاززات يبراگيموۆا.
ارتىنشا ءوتىنىش بەرۋشىنىڭ ماماندىعى تەكسەرىلەدى – باعدارلاماعا تەك سىناما الۋشىلار, تەحنيكتەر, تەحنولوگتار, جۇرگىزۋشىلەر سياقتى جۇمىسشى ماماندىقتارىنىڭ وكىلدەرى عانا قاتىسا الادى. وسى ۇيىمداردا جۇمىس ىستەيتىن, بىراق كەڭسە لاۋازىمدارىن اتقاراتىن قىزمەتكەرلەر – كەڭسە مەنەدجەرلەرى, PR-مەنەدجەرلەر, بۋحگالتەرلەر جانە ت.ب. باعدارلاماعا قاتىسا المايدى.

«سالانىڭ پين-كودىن, ەقجج (ەكونوميكالىق قىزمەت تۇرلەرىنىڭ جالپى جىكتەۋىشى) مەن ماماندىعىن تەكسەرگەننەن كەيىن ءوتىنىش بەرۋشى پاتەر تاڭداي الادى. قارىزدىڭ ماكسيمالدى سوماسى استانا مەن الماتى قالالارى ءۇشىن 36 ملن تەڭگەنى, ال قالعان وبلىس ورتالىقتارىنا 30 ملن تەڭگەنى قۇرايدى. ساتىپ الىناتىن تۇرعىن ءۇي Baspana Market پورتالىندا تاڭدالادى, وندا جىلجىمايتىن م ۇلىك قۇنىنىڭ نەگىزسىز ءوسۋىن بولدىرماۋ ءۇشىن شارشى مەتردىڭ باعاسى بەلگىلەنەدى. ەگەر جۇمىسشى, مىسالى, تەمىرجولشى استاناعا جاقىن №80, 90 نەمەسە 96 رازەزد اۋدانىندا بولسا جانە باستاپقى تۇرعىن ءۇيى جوق اۋدان ورتالىعىندا نەمەسە مونوقالادان تۇرعىن ءۇي ساتىپ العىسى كەلسە, باعدارلاما قايتالاما نارىقتاعىنى ساتىپ الۋعا رۇقسات بەرەدى», – دەپ اتاپ ءوتتى «وتباسى بانكى» باسشىسى.

ەگەر پاتەردى قۇرىلىس سالۋشى ارلەۋمەن ۇسىنسا, وندا باستاپقى جارنا تۇرعىن ءۇي قۇنىنىڭ 10%-نا دەيىن تومەندەتىلەدى.