جاڭالىقتار
نازارباەۆتىڭ سەرىكتەرىنىڭ ءبىرى ابىقاەۆ باسشىلىق قىزمەتىنەن كەتتى
فوتو: اشىق دەرەككوز
ەكس-پرەزيدەنت نۇرسۇلتان نازارباەۆتىڭ ادال سەرىكتەستەرىنىڭ ءبىرى, ونىڭ دوسى ءارى كومەكشىسى نۇرتاي ابىقاەۆ قازاقستان ۆولەيبول فەدەراتسياسىنىڭ باسشىسى قىزمەتىنەن ايىرىلدى, دەپ حابارلايدى qandastar.kz
«الماتىدا قازاقستان ۆولەيبول فەدەراتسياسىنىڭ (قۆف) ەسەپ بەرۋ-سايلاۋ كونفەرەنتسياسى ءوتىپ, وندا ءمادي تاكيەۆ 2024-2028 جىلدارعا ۇيىمنىڭ جاڭا پرەزيدەنتى بولىپ سايلاندى. بۇل قىزمەتتە ول نۇرتاي ابىقاەۆتى الماستىردى. قفف-نىڭ جاڭا باسشىسى ءوز سوزىندە دەلەگاتتارعا سەنىمدەرى ءۇشىن شىن جۇرەكتەن العىس ايتىپ, نۇرتاي ابىقاەۆتى فەدەراتسيانىڭ قۇرمەتتى پرەزيدەنتى بولۋعا جانە قفۆ قامقورشىلىق كەڭەسىن باسقارۋعا شاقىردى.
ءمادي تاكيەۆ سونداي-اق قاسىم-جومارت توقاەۆتىڭ ەلىمىزدەگى سپورتتى قارجىلاندىرۋ ساياساتىن قايتا قاراۋدى تاپسىرعانىن ەسكە سالدى. اتاپ ايتقاندا, كلۋبتار مەن فەدەراتسيالار قازاقستاننىڭ تۇكپىر-تۇكپىرىندە دە بۇقارالىق سپورتتى دامىتۋعا باسا نازار اۋدارا وتىرىپ, دەمەۋشىلىك پۋلدى بەلسەندى تۇردە قالىپتاستىرۋعا كىرىسۋى كەرەك, سونداي-اق ءوز سپورتشىلارىن دايىنداۋدى كۇشەيتۋى كەرەك», – دەلىنگەن حابارلامادا.
وسى جىلدار ىشىندە ابىقاەۆ بىرنەشە رەت قازاقستان پرەزيدەنتىنىڭ اپپاراتى مەن اكىمشىلىگىن باسقاردى, ەكى رەت ۇلتتىق قاۋىپسىزدىك كوميتەتىن باسقاردى, قاۋىپسىزدىك كەڭەسىنىڭ مۇشەسى بولدى جانە نازارباەۆ تۇسىندا باسقا دا ماڭىزدى قىزمەتتەردى اتقاردى. ابىقاەۆ «كونە قازاقستان» دەپ اتالاتىن كوشباسشىلاردىڭ ءبىرى بولىپ سانالادى.
ءمادي تاكيەۆ بۇعان دەيىن 2023 جىلدىڭ اقپانىنان باستاپ قارجى ءمينيسترى قىزمەتىن اتقارىپ كەلەدى, ودان بۇرىن, 2020 جىلدىڭ قىركۇيەگىنەن باستاپ پرەزيدەنت اپپاراتىنىڭ الەۋمەتتىك-ەكونوميكالىق مونيتورينگ ءبولىمىن باسقارعان.
