Nesıesin 90 kún tóleı almaǵandarǵa tutynýshy kredıtin berýge tyıym salynbaq

El turǵyndarynyń qarjy uıymdarynyń aldyndaǵy bereshegi 19 trln teńgege jetti. Bul týraly Májilistiń jalpy otyrysynda depýtat Únzıla Shapaq aıtty.

«Memleket basshysy 2023 jylǵy 1 qyrkúıektegi Joldaýynda halyqtyń shamadan tys kredıt alýyn azaıtý jóninde sharalar qabyldaýdy tapsyrdy. Memleket basshysynyń tapsyrmasyn iske asyrý aıasynda 2023 jylǵy 20 qazanda memlekettik organdardyń, qarjy uıymdarynyń, táýelsiz sarapshylar men qoǵam belsendileriniń qatysýymen halyqtyń shamadan tys kredıt alýy máseleleri boıynsha Parlamenttik tyńdaý ótti. 2024 jylǵy 1 qańtardaǵy jaǵdaı boıynsha 8,5 mıllıon qazaqstandyqtyń qarjy uıymdarynyń aldynda 19 trln teńge somasyna bereshegi bar. Onyń ishinde 8,2 mıllıon azamattyń kepilsiz tutynýshylyq kredıtter boıynsha bereshegi 10 trln teńgeni quraıdy. Bul rette 1,6 mln azamattyń 1,7 trln teńgege 90 kúnnen artyq merzimi ótken problemalyq kredıtteri bar», — dedi depýtat.
Únzıla Shapaqtyń atap ótýinshe, parlamenttik tyńdaýdyń qorytyndysy boıynsha júıeli usynymdar kesheni ázirlendi.

Onyń negizinde Májilis depýtattary «Keıbir zańnamalyq aktilerge kredıt berý kezinde táýekelderdi barynsha azaıtý jáne qaryz alýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» Zań jobasyn ázirledi.

«Problemalyq qaryzdary bar azamattardyń qaryz júktemesiniń ósýine jol bermeý úshin kredıtter boıynsha tólem merzimin keshiktirý 90 kúnnen asqan jaǵdaıda olarǵa kepilsiz tutynýshylyq kredıtter berýge tyıym salý jóninde norma engiziledi. Budan basqa, bankter men mıkroqarjy uıymdary úshin barlyq qoldanystaǵy (ótelmegen) tutynýshylyq kredıtter boıynsha tólem merzimin keshiktirý 90 kúnnen asqan soń syıaqy esepteýge tyıym salynady», — dedi ol.