نۇرلان ونەرباەۆ: قازاق ءتىلى ءالى بوساعادان سىعالاپ ءجۇر

«QASQA JOL» يۋتۋب باعدارلاماسىنىڭ بۇل اپتاداعى قوناعى ءانشى, قازاقستاننىڭ ەڭبەك سىڭىرگەن قايراتكەرى نۇرلان ونەرباەۆ قازاق ونەرىندەگى ارتىقشىلىقتار مەن كەمشىن تۇستاردى, قازاق ءتىلىنىڭ بولاشاعى جايلى, سونداي-اق اعامىزدىڭ جەكە ءومىرى جونىندە ءسوز قوزعادى, دەپ حابارلايدى qandastar.kz

«ەل بولىپ ەگەمەندىك العالى, تۋىمىزدى كوككە كوتەرگەلى ءتىلىمىز تاۋەلسىزدىك الا الماي قويدى. ءالى دە سول ءتىلىمىز بوساعادا ءجۇر. ءبىز ونەر ادامى بولعاندىقتان, ساحنادا ءتول مادەنيەتىمىزدى ءوزىمىزدىڭ انا تىلىمىزدە جەتكىزگىمىز كەلەدى. ال ەگەر ءتىلىمىز وسى مۇشكىل كۇيىندە ءارى قاراي كەرى كەتە بەرەتىن بولسا, ەرتەڭ سەنى انا تىلىڭدە سويلەپ تۇرعان ءسوزىڭ, ءانىڭ, جىرىڭ كىمگە كەرەك بولادى? بۇل وتە وزەكتى ماسەلە. مەن ءوزىم جۇرگەن جەرىمدە ءتىلىمىزدى دارىپتەپ جۇرەمىن», — دەدى ونەر يەسى.

سونداي-اق, نۇرلان ونەرباەۆ كوشەدە بالاسىمەن ورىس تىلىندە سويلەسەتىن اتا-انالارعا جيىركەنىشپەن قارايتىنىن جاسىرمادى.

«ءوزىمىزدىڭ قازاق ازاماتتارى بالاسىمەن شۇلدىرلەپ باسقا تىلدە سويلەپ جاتقاندارى جانىما باتادى. وتە جيىركەنىشتى جاعداي. ءوزىمىز قازاقتىڭ بالاسى بولا تۇرا, تۋعاننان بويىمىزعا انانىڭ سۇتىمەن قازاقتىڭ ءتىلى دامىسا دا وزگە ءتىلدى قۇپ كورىپ تۇرامىز. ءوز ۇرپاعىڭا ءوز انا تىلىڭدە سويلەي الماۋ دەگەن, بىرىنشىدەن ءوز اتا-اناڭدى تارك ەتۋ, ءوز بولمىسىڭدى ءتار ەتۋ جانە ءوز ۇلتىڭدى تارك ەتۋ, ياعني ءبارىن جوققا شىعارۋ دەگەن ءسوز. مەن ەندى ونداي ادامدارعا العاشقى كەزدە ەسكەرتۋ دە جاساپ كوردىم, مۇنداي كەزدە جۇرتتار وتە اشۋلانىپ, اگرەسسيا تانىتادى. سول سەبەپتى قازىرگى كەزدە ەشكىمگە ەسكەرتۋ جاساپ, ايتپايتىن دا بولدىم. بيلىك قالاسا ءبارىن ءبىر كۇندە قازاقشا سايراتار ەدى. نەگىزىنەن قازاق ءتىلىن مەملەكەتتىك رامىزدەر قاتارىنا قوسىلسا دەگەن تىلەگىم بار. سوندا ءتىلىمىز زاڭمەن قورعالاتىن بولادى», — دەپ قورىتىندىلادى ول.