جاڭالىقتار
ويىل اۋدانىندا قالقىمالى كوپىر ورناتىلادى
اقتوبە وبلىسىنىڭ ويىل اۋدانىندا ۋاقىتشا قالقىمالى كوپىر ورناتىلاتىن بولدى.
بۇل تۋرالى بۇگىن رەسپۋبليكالىق شتاب وتىرىسىندا توتەنشە جاعدايلار ءمينيسترى شىڭعىس ءارىنوۆ ايتتى. توپان سۋ اسفالت جولىن شايعاندىقتان ءوڭىردىڭ 15 مىڭ تۇرعىنى وبلىس ورتالىعىنان وقشاۋ قالىپ, كولىك قاتىناسى قيىنداعان ەدى. قورعانىس مينيسترلىگىنە تيەسىلى ينجەنەرلىك قۇرىلعى الماتى وبلىسىنان جەتكىزىلەدى. شىڭعىس ءارىنوۆ, قر توتەنشە جاعدايلار ءمينيسترى: — بۇل كولىك قاتىناسى ماسەلەسىن ۋاقىتشا شەشۋ جولى. تۇرعىندار ازىق-ت ۇلىك جانە ءدارى-دارمەك سياقتى قاجەتتى تاۋارلارمەن دەر كەزىندە قامتاماسسىز ەتىلەدى.
جول جوندەلگەنشە وسى كوپىردى پايدالانادى. جالپى ەلىمىزدىڭ 6 وبلىسىندا جاعداي ءالى دە بولسا كۇردەلى. 1300-دەن استام باسپانا سۋعا كەتكەن. پرەمەر-ءمينيستردىڭ ورىنباسارى قانات بوزىمباەۆ ءتىلسىز جاۋدان زارداپ شەككەن ءاربىر اۋىلعا قاجەتتى ازىق-ت ۇلىك پەن وزگە دە بۇيىمداردى جەتكىزۋ ۇيىمداستىرىلعانىن ايتتى. ال قاتەرلى ايماقتاردان ادامداردى ەۆاكۋاتسيالاۋ جۇمىستارى ۇزدىكسىز جۇرگىزىلىپ جاتىر. قانات بوزىمباەۆ ەل توڭىرەگىندە سۋ تاسقىنىنىڭ بەتى قايتا قويماعانىن ايتىپ, شىعىس پەن سولتۇستىك قازاقستان وبلىستارىنا دايىندىقتى كۇشەيتۋ كەرەكتىگىن ەسكەرتتى. قانات بوزىمباەۆ قر پرەمەر-ءمينيسترىنىڭ ورىنباسارى: — تاياۋدا ەلىمىزدە جاۋىن-شاشىن بولىپ, اۋا-رايى كۇرت جىلىنىپ كەتۋى مۇمكىن, بۇل اسىرەسە ورتالىق جانە سولتۇستىك قازاقستاندا قاردىڭ جىلدام ەرۋىنە تۇرتكى بولادى. سايكەسىنشە وزەن-كولدەر تولىپ, ەلدى مەكەندەرگە قاۋىپ ءتونۋى مۇمكىن. وسىعان بايلانىستى وڭىرلەردىڭ اكىمدىكتەرى قاۋىپسىزدىكتى قامتاماسىز ەتۋى ءتيىس.
