الەم جاڭالىقتارىجاڭالىقتار
«ول جەردە ءبارى اقشامەن شەشىلەدى»: ايسۇلتان نازارباەۆتىڭ 4 جىل بۇرىنعى بولجامى ءدال كەلدى
فوتو: zn.ua
ايسۇلتان نازارباەۆ وسى جازباسىن جازعاننان كەيىن ەكى ايدان سوڭ قازا تاپتى.
ەكس-پرەزيدەنت نۇرسۇلتان نازارباەۆتىڭ جيەنى مارقۇم ايسۇلتان نازارباەۆتىڭ ترامپقا قاتىستى ايتقان بولجامى ورىندالدى, – دەپ حابارلايدى qandastar.kz اقپارات پورتالى Dalanews.kz-كە سىلتەمە جاساپ.
2020 جىلى ايسۇلتان الەۋمەتتىك جەلىدەگى پاراقشاسىندا دونالد ترامپ 2024 جىلى ەكىنشى رەت اقش پرەزيدەنتى بولاتىنىن ايتقان.
«ترامپ ەكىنشى رەت پرەزيدەنت بولىپ, امەريكادا دەموكراتيا جوق ەكەنىنە كوز جەتكىزەسىزدەر. ول جەردە ءبارى اقشامەن شەشىلەدى! ترامپ اقش تاريحىنداعى سوڭعى پرەزيدەنت بولادى. ۇلى دەرجاۆانىڭ قۇلاۋىمەن بارلىعى كۇيرەي باستايدى «, – دەپ جازعان ەدى ايسۇلتان Facebook پاراقشاسىندا.
ايسۇلتان نازارباەۆ وسى جازباسىن جازعاننان كەيىن ەكى ايدان سوڭ قازا تاپتى.
ەسكە سالايىق, بۇگىن اقش-تاعى پرەزيدەنت سايلاۋىنىڭ الدىن الا ناتيجەسى شىقتى. امەريكا قۇراما شتاتتارىنداعى پرەزيدەنت سايلاۋىنىڭ جەڭىمپازى – دونالد ترامپ.
Fox News مالىمەتىنشە, ترامپ 277 داۋىس الدى, بۇل ونىڭ پرەزيدەنت سايلاۋىندا جەڭىسكە جەتكەنىن بىلدىرەدى.
The Hill باسىلىمى دا دونالد ترامپ سايلاۋدا جەڭىسكە جەتكەنىن مالىمدەدى. ترامپ پەنسيلۆانيا مەن الياسكادا دا كوش باستاعان.
بۇل دەرەكتەردى سوڭعى ناتيجە دەپ ساناۋعا بولمايدى, ويتكەنى داۋىس ساناۋ بىرنەشە كۇنگە سوزىلۋى مۇمكىن.
ايتا كەتەيىك, بۇعان دەيىن ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ مەڭگەرۋشىسى م.ا. جانات مومىنقۇلوۆ Dalanews.kz-كە سۇحبات بەرىپ, سايلاۋ ناتيجەلەرى تۋرالى بولجام جاسادى.
«ترامپ الەمدىك ساياساتتا ويىپ تۇرىپ ورىن الادى. ونىڭ ۇستىنە قازىرگىدەي داعدارىس, سوعىس جاعدايىندا ونىڭ ءىس-قيمىلى – ءبارى وتە ماڭىزدى. بىراق حارريس قالعان جاعدايدا امەريكانىڭ وسى ساياساتى جالعاسا بەرەدى. قىتايعا, رەسەيگە, يرانعا قاتىستى شەكتەۋ, تەجەۋ ساياساتى جۇرەدى.
مەنىڭ ويىمشا, ءحارريستىڭ جەڭىسىنە قۋانامىز. ال ترامپ كەلەتىن بولسا, رەسەيمەن قارىم-قاتىناسىنداعى وزگەرىستەر ورتالىق ازياعا, بىزگە سالقىن اسەر ەتەدى. ءبارى اينالىپ كەلگەندە حالىقارالىق جۇيەگە اسەر ەتەدى. ءبىز بولجاپ بولمايتىن وقيعالار باستالىپ كەتۋى مۇمكىن. حارريس ورتالىق ازياعا جاڭا ءبىر كوزقاراس تانىتۋى مۇمكىن, ول – اق ءۇيدىڭ ماڭىنداعى بيۋروكراتتاردىڭ وكىلى, تۇراقتىلىقتىڭ «گارانتياسى». ال ترامپ كەلسە, ۋكرايناداعى جاعداي ۇزاققا سوزىلاتىن داۋعا اينالۋى مۇمكىن. سوندىقتان, مەنىڭ ويىمشا, ءحارريستىڭ كەلگەنى قازاقستانعا ءتيىمدى. ورتالىق ازياعا تىكەلەي اسەرى بولماسا دا, شەشىمدەرى ارقىلى اينالىپ كەلگەندە اسەرى بولادى», – دەدى ول.
