«ولاردىڭ قالاۋى ورتالىقتان ءزاۋلىم ءۇي»: جۋرناليست نۇسىپجانوۆقا اكىمدىك پەن جومارت جاندار بىرنەشە ءۇي سىيلاعانىن ايتتى

الەۋمەتتىك جەلىدە ءانشى نۇرعالي ءنۇسىپجانوۆتىڭ ءۇيسىز جۇرگەنى تۋرالى اقپارات تاراپ كەتتى. وسىعان بايلانىستى بىرقاتار ازاماتتار حالىق ءارتىسىن قولداپ, جەلىدە جازبا جاريالانعان بولاتىن. ال جۋرناليست اسيا اسەتكينا جەلىدە ءانشىنى قولداپ جازعان پوستىن وشىرگەنىن ايتتى.

«دوستار, مەن نۇرعالي ءنۇسىپجانوۆ تۋرالى پوستىمدى ءوشىردىم. سەبەبى, اعانىڭ جاعدايىن جاقسى بىلەتىن كىسىلەردىڭ ايتۋى بويىنشا, نۇرعالي اعاعا وسىعان دەيىن ءبىر ەمەس, بىرنەشە رەت (اكىمدىكتەن دە, مەتسەناتتار دا) ءۇي سىيلاعان ەكەن. بىراق ولاردىڭ, جاس جۇبايى جادىرا ەكەۋى ول العان ۇيلەرىن قاناعات تۇتپاي, قالاۋلارى – الماتىنىڭ جاقسى رايونىنان, ۇلكەن ءۇي الۋ ەكەن. انىعىن ءبىلىپ الماي, اسىعىس پوست سالعانىم ءۇشىن وزدەرىڭىزدەن كەشىرىم سۇرايمىن», – دەپ جازدى ول facebook-تەگى پاراقشاسىنا.