«О́limge deıin jetkizbeı ajyrasqan durys»: Dana Nurjigit depýtat Ardaq Nazarovty synǵa aldy

Senattyń burynǵy depýtaty, telejýrnalıst Dana Nurjigit májilis depýtaty Ardaq Nazarovtyń ajyrasýǵa qatysty usynysyn synǵa aldy, dep habarlaıdy qandastar.kz saıty.

Buǵan deıin májilis depýtaty Ardaq Nazarov eldegi ajyrasý kórsetkishine alańdaýshylyq bildirip, úkimet basshysy Oljas Bektenovke joldaǵan depýtattyq saýalynda birneshe usynys aıtqan edi.

Onyń ishinde ajyrasatyndarǵa jarna tóleý tártibin engizý, resmı túrde ajyrasqan tulǵalar úshin tabys salyǵynyń mólsherlemesin kezeń-kezeńimen arttyrý usynystary bar.

«Birinshiden, ajyrasýǵa ótinish bildirgen erli-zaıyptynyń birjaqty sheshimi negizinde sotqa aryz qabyldanbas buryn arnaıy memlekettik baj nemese jarna tóleý tártibin engizý qajet. Bul tólemniń kólemi edáýir joǵary bolýy tıis. Sonymen qatar resmı túrde ajyrasqan tulǵalar úshin tabys salyǵynyń mólsherlemesin kezeń-kezeńimen arttyrý qarastyrylsyn», — degen bolatyn Ardaq Nazarov.

Dana Nurjigittiń pikirinshe, depýtat Nazarov keltirgen eldegi ajyrasý deńgeıine qatysty statıstıka alańdatady. Alaıda «ajyrasqandarǵa salyq salý» – aqylǵa syımaıtyn usynys.

«Nazarov aıtqan statıstıka shoshytady. Odan da sonyń sebebin zertteıtin ýaqyt keldi deıik! Bir de bir adam ajyrasamyn dep qosylmaıdy! Ár túrli jaǵdaı, sebep bar. Tipti bas jarylyp, kóz shyqpaı turǵanda, ólimge deıin jetkizbeı ajyrasqan durys der edim. Sanaly ata-ana balany osy jaǵdaıda da durys ósirýdiń jolyn tabady. Oǵan tek tárbıe, mádenıet, túısik jetse, árıne!

Depýtat keltirgen derektegi 400 myń jalǵyzbasty ana, 60 myń jalǵyzbasty áke otbasy ınstıtýtyn túbegeıli áleýmettik zertteýden, saraptaýdan ótkizý kerek degen sóz. Soǵan qaraı «Neke jáne otbasy» kodeksin qaıta qaraý kerek degen qyzyl belgi bul!

Al ajyrasqandarǵa salyq salý kerek degeni tipti absýrd! Adamdy erkinen tys qasyńda ustaý, salyqqa ushyraımyz dep ajyraspaý ma bul?! Aqylǵa syımaıtyn májbúrleý ǵoı mynaý! Adam quqyǵy qaıda qaldy sonda, depýtat myrza? Otbasy ıntıtýtyn dál osyndaı radıkaldy formada «qorǵamasańyz» etti…», — dep jazdy Dana Nurjigit Instagram jelisindegi paraqshasynda.