«О́ltire ber, ózim jaýap beremin»: Mekteptegi álimjettikten qaza tapqan oqýshynyń ata-anasy zar jylap otyr

Foto: ashyq derekkóz

Qyrkúıek aıynyń basynda álimjettik saldarynan taǵy bir oqýshy kóz jumdy, dep jazady qandastar.kz inbusiness.kz saıtyna silteme jasap.

«Kóremiz» baǵdarlamasyna ádildik surap marqumnyń týysqandary keldi. 9-synyp oqýshysyn bir top bala jabylyp urǵan kórinedi.

«6 balanyń anasymyn. Nurjan – ekinshi ulym. 2009 jyly 6 qazanda dúnıege keldi. Balalarym kishkentaı bolǵasyn mekteptegi álimjettik degendi bilmeppin. Nurjannyń óliminen keıin aýyl shýlap ketti. Mektepte býllıng bar eken. Báleniń bári 9-synypqa kóshkennen keıin bastalyp otyr. Mama, 15 jasymdy kúshti etip toılaımyz ǵoı» dep aıtyp júretin. Oǵan jetpedi. 10-11 synyptyń balalary jabylyp urǵan. Sol oqıǵany kórgen kórshi bala anasyna júgirip kelip, «Birjan aǵanyń balasy qulap jatyr» depti. Qatty qorqyp ketken sııaqty. Eski monshanyń ishine jınalǵan. Kóliktiń jaryǵy shaǵylysa bergesin, eski úıge aparyp, tóbelesti jalǵastyrǵan. 11-synyp oqıtyn oqýshy «Nurjandy óltire ber, ózim jaýap berem» depti. Meniń balamda nendeı ákesiniń quny bar?! Endi jaýap bersin. Qaraqustan tepkennen keıin, turmaı qalǵan», – dedi Amangúl Raýshanova.

Qandy oqıǵa qoǵamdy dúrliktirdi. О́ıtkeni qylmystyń tergelýi «barmaq basty, kóz qysty» bolyp ketken. Marqumnyń ápkesi áleýmettik jelide vıdeo jarııalap, qoǵamdyq rezonans týdyrdy.

«Aýylymyzda bir ǵana mektep bar. Mekteptegi álimjettik burynnan bar. Joǵary synyp oqýshylary tómengi synyptaǵy balalarǵa álimjettik jasaıtyn. Nurjannyń dene bitimi iri bolǵasyn, kóbinde ol synyptastaryn qorǵap júretin. Boks úıirmesine barǵan. Synyptas qyzdary: «Nurjandy qattyraq uryńdar» degen sózdi aıtyp jatyr. Odan keıin papamnyń qaryndasynyń qyzyna «10 ýdar alamyn da, qaıtyp kelemin” dep jazyp jiberipti. Men Almatyda bolǵasyn inimniń janazasyna úlgermedim. Biraq erteńine úlgerip keldim», – dedi marqumnyń ápkesi Aıajan Sydyq.

«Kóremiz» túsirilim toby barǵanda marqumnyń otbasyna kúdikti 15 balanyń ata-anasy baryp, keshirip surap kelgen. Alaıda qara jamylǵan otbasy keshirim bermeıtinderin aıtty. Alaıda Gúlnaz esimdi kelinshek ulynyń sol oqıǵany kózimen kórgenin aıtyp berdi.

«Meniń ulym Erasyl Nurjanǵa kómektespek bolyp, aýyl dárigerin shaqyrǵan. 11-synyptyń oqýshylary 10 synyptyń oqýshylaryn jyl saıyn osylaı urady eken. Tártipke salyp, keýdelerinen urady eken. Tek bir ýdar ǵana beredi eken. Meniń balam kómektesken. Nurjaýǵan degen bala ekeýi Nurjandy kóterip alǵan. Aıtylyp jatqan aqparattyń bári jalǵan. Eshkim ony jabylyp urǵan joq, kerisinshe bári kómektesken”, – dedi aýyl turǵyny.

14 jastaǵy balanyń ólimine ázirge úsh bala kúdikti dep tanyldy. Mektep muǵalimderi Jansen men Nurjaýǵan jáne Erkebulannyń tártipti oqýshy bolǵanyn aıtady. Alaıda marqumnyń anasy kúdiktiler jazadan qutylyp kete me dep alańdaıdy. Kúdiktiniń ata-analary marqumnyń otbasyn jalǵan aqparat taratyp otyr dep aıyptaıdy.

«Jansen qazir tergeýde otyr. 11-synyptyń oqýshylary 10-synyp oqýshylaryna buıryq bergen. Ulymnyń kisi ólimine qatysy joq. 10-synyp oqýshylary aqyryndap ura bastaıdy, biraq qatty uryńdar dep aıtady. Bes balanyń beseýi de uryp shyqqan. Ulym qashyp kete almadym, bári qarap tur» dedi. Marqumnyń otbasy jalǵan aqparat taratty. Olar Nurjandy óltirip, qashyp ketken joq», – dedi Jansenniń atasy men ákesi.