Oljas Bektenov BQO Qorjyn aýylynda boldy

Qazaqstan Premer-Mınıstri Oljas Bektenov Batys Qazaqstan oblysynda sý tasqyny saldarynan zardap shekken, shalǵaıda ornalasqan Qaratóbe aýdany Qorjyn aýylyna bardy.

Munda qıraǵan úılerdiń ornyna bir páterli 90 turǵyn úı salynyp jatyr. Irgetas qurylysy boıynsha jumys tolyǵymen aıaqtalǵan. Búgingi tańda 34 úıdiń qabyrǵasy turǵyzylyp, 56 úıdiń tóbesi jabylyp jatyr. Nysandardyń jalpy daıyndyǵy 50%-ǵa jetedi.

Buǵan deıin Premer-Mınıstrdiń tapsyrmasy boıynsha ýchaskede jumys isteıtinderdiń sany 30%-ǵa artqan bolatyn. Qazirgi ýaqytta nysandarda 288 adam jumys isteıdi. Jumys kestege sáıkes júrgizilýde.

Oljas Bektenov salynyp jatqan qurylystardyń sapasyna erekshe nazar aýdardy.

Qorjyn aýylynda 6 merdiger uıym jumys isteıdi. Qurylys-montajdaý jáne jóndeý-qalpyna keltirý jumystaryn júrgizý kezinde bekitilgen qurylys normalarynyń talaptary buzylǵan jaǵdaıda qurylys kompanııalary jaýapkershilikke tartylatyny atap ótildi.

Jobaǵa sáıkes úılerde qalyńdyǵy 400 mm taspaly irgetas qarastyrylǵan, irgetastyń túbinen bıiktigi 1500 mm bolady. Qabyrǵalardy turǵyzýǵa qaptalǵan sılıkatty qyzyl kirpish, keramzıtti blok, mıneralmaqta plıtasy qoldanylýda. Sondaı-aq jobada ınjenerlik jelilerdi júrgizý kózdelgen.

Premer-Mınıstr qurylys-jóndeý jumysy barysynda otandyq óndiris materıaldaryn paıdalanýdyń mańyzyn atap ótti.

Áleýmettik ınfraqurylymǵa kelsek: aýylda qazirgi ýaqytta jóndeý jumystary júrgizilip jatqan 400 orynǵa arnalǵan mektep bar. Sonymen qatar jańa úılerdiń bolashaq turǵyndary úshin balalar alańy salynady.

«Jumysta kemshilikter bolmaýy kerek. Memleket basshysy úılerdiń tıisti sapasyn qamtamasyz etýdi tapsyrdy. Turǵyn úılerdi barlyq ınjenerlik jelilerge birden qosý qajet. Bul rette jol ınfraqurylymy men áleýmettik nysandardy tezirek qalpyna keltirýdi qamtamasyz etý mańyzdy. Aýrýhanalar, mektepter men balabaqshalar sapa men tehnıkalyq jaraqtandyrýdyń zamanaýı talaptaryn eskere otyryp salynýy kerek», — dep atap ótti Oljas Bektenov.

Jaýapty mınıstrlikter men ákimdikke birqatar tapsyrma berildi.

Anyqtama: Batys Qazaqstan oblysynda 775 úıdiń qurylysy bastaldy, 2 248-i qaıtalama naryqtan satyp alynady, 1 383 nysan jóndeledi. Úıler men saıajaılardy jóndeý jumystary 82,3%-ǵa aıaqtaldy. Úı salý úshin 59 merdiger uıym anyqtaldy. Oral qalasynda 374 nysan jáne aýyldyq jerlerde taǵy 401 úı salynyp jatyr. Jalpy daıyndyq 66% quraıdy.

Sý tasqynynan 12 áleýmettik mekeme, 53 kólik ınfraqurylymy obektisi, 43 gıdrotehnıkalyq qurylym zardap shekti — barlyǵy boıynsha tıisti jumystar júrgizilýde. О́ńirlik komıssııa sý tasqynynan zardap shekkenderge tólemder berý jumysyn aıaqtady. Máselen, 9 994 otbasy 100 AEK kóleminde ótemaqy aldy (3,7 mlrd teńge), 10 222 ótinish berýshige 150 AEK-ke deıin (3,7 mlrd teńge) berildi, sýǵa ketken mal úshin 151 mln teńge deıin tólendi. Bızneske keltirilgen zalaldy óteý jumystary 35%-ǵa oryndaldy.