جاڭالىقتار
ولجاس بەكتەنوۆ شاحتەرلەرمەن بىرگە 520 مەتر تەرەڭدىكتە جەر استىنا ءتۇستى
پرەمەر-مينيستر ولجاس بەكتەنوۆ قاراعاندى وبلىسىنداعى جۇمىس ساپارى كەزىندە «ساران» شاحتاسىنداعى ەڭبەك قاۋىپسىزدىگىنىڭ قامتاماسىز ەتىلۋىن تەكسەردى. بۇل تۋرالى پرەمەر-ءمينيستردىڭ ءباسپاسوز قىزمەتى مالىمدەدى.
وسى ماقساتتا پرەمەر-مينيستر شاحتەرلەرمەن بىرگە 520 مەتر تەرەڭدىككە ءتۇسىپ, كەن قازۋ ۋچاسكەلەرىن ارالادى.
ايتا كەتۋ كەرەك, ولجاس بەكتەنوۆ شاحتەرلەرگە ارنالعان ارنايى كيىم كيىپ, جارىق شامى بار كاسكا تاعىپ, جەر استىندا جۇمىس ىستەۋ ءۇشىن قويىلاتىن بارلىق تالاپتاردى ساقتادى.
«Qarmet» اق كومىر دەپارتامەنتىنىڭ ديرەكتورى جاقان مۇحامەدجانوۆ قىزمەتكەرلەردى ورىنى بويىنشا باقىلاۋ جۇيەسىنىڭ حالىقارالىق ستاندارتتار بويىنشا ەنگىزىلىپ جاتقانىن باياندادى. بۇل تەحنولوگيالار شاحتەرلەردىڭ ناقتى ورنالاسقان جەرىن ناقتى ۋاقىت رەجيمىندە باقىلاۋعا جانە توتەنشە جاعداي كەزىندە جەدەل شەشىم قابىلداۋعا مۇمكىندىك بەرەدى.
سونىمەن قاتار, پرەمەر-مينيسترگە جۇمىس ورنىنداعى شاحتەرلەرمەن تىكەلەي بەينەبايلانىس ارناسى دا كورسەتىلدى. شاحتانى جاڭعىرتۋ باعدارلاماسى جەر قازۋ جابدىقتارىن جاڭارتۋ, جەلدەتۋ جۇيەلەرىن جاقسارتۋ جانە جەر استىنداعى جۇمىستار كەزىندە ءورت قاۋىپسىزدىگىن ارتتىرۋدى قاراستىرادى.
شاحتا ۋچاسكەسىندە ولجاس بەكتەنوۆ كەنشىلەرمەن تىلدەسىپ, جەر استى تسيفرلاندىرۋىنا كوشۋ ماسەلەسىن تالقىلادى.
پرەمەر-مينيستر مۇنداي جەر استى تەحنولوگيالارى وزگە دە كومىر شاحتالارىندا ەنگىزىلەتىنىن جانە بۇل ەڭبەك قاۋىپسىزدىگىن ارتتىرۋعا باعىتتالاتىنىن اتاپ ءوتتى. Qarmet-ءتىڭ كومىر كاسىپورىندارىن جاڭعىرتۋعا سالاتىن جالپى ينۆەستيتسيا كولەمى – شامامەن 500 ميلليون اقش دوللارى
