ونكولوگياعا قارسى ءدارى: وتاندىق ءدارىنى سىناقتان وتكىزۋدىڭ ەكىنشى كەزەڭى باستالدى

فوتو: اشىق دەرەككوز

عىلىم جانە جوعارى ءبىلىم ءمينيسترى ساياسات نۇربەك ۇكىمەت وتىرىسىندا قازاقستاندا ازىرلەنگەن ونكولوگيانى ەمدەۋگە ارنالعان پرەپارات ادامدارعا كلينيكالىق سىناق جۇرگىزۋدىڭ ءبىرىنشى كەزەڭىنەن ءساتتى وتكەنىن ءمالىم ەتتى. زەرتتەۋگە ونكولوگيالىق اۋرۋمەن سىرقاتتانعان 15 ناۋقاس قاتىستى, دەپ حابارلادى qandastar.kz.
«1 شىلدەدەن باستاپ تەستىلەۋدىڭ ەكىنشى كەزەڭى باستالدى. كلينيكالىق سىناققا 3 مىڭعا جۋىق ادام قاتىسادى. بارلىعى 5 مىڭنان استام ونكولوگيالىق ناۋقاس سىناققا قاتىسۋعا نيەت ءبىلدىرىپ تىركەلدى. قاراجات جوعارى عىلىمي-تەحنيكالىق كوميسسيانىڭ شەشىمىمەن قاراستىرىلعان – زەرتتەۋ توبىنا ەكىنشى كەزەڭدى جۇرگىزۋگە شامامەن 2 ملرد تەڭگە تامىز ايىندا اۋدارىلادى. جىل سوڭىنا دەيىن بارلىق دەرەكتى وڭدەيمىز. كەلەسى جىلى ءدارى-دارمەكتى تىركەۋگە شىعارامىز دەگەن سەنىمدەمىز», – دەدى ساياسات نۇربەك.
ونكولوگيانىڭ ەڭ اگرەسسيۆتى تۇرلەرىنىڭ ءبىرى – توق ىشەك قاتەرلى ىسىگىنىڭ IV ساتىسى انىقتالعان ناۋقاستار ەرىكتى رەتىندە قاتىسقان كلينيكالىق سىناقتاردىڭ ءبىرىنشى كەزەڭىنىڭ ناتيجەسى بويىنشا پرەپارات تيىمدىلىگىن كورسەتتى. ىسىك ورتا ەسەپپەن 30%-عا ازايدى.
بۇل رەتتە ەكىنشى كەزەڭ ءتۇرلى قاتەرلى ىسىگى بار ادامدارعا ءدارى-دارمەكتى تەكسەرىپ كورۋدى قامتيدى. سىناق استانا, الماتى جانە پاۆلوداردا وتكىزىلەدى.
ەسكە سالا كەتسەك, قاتەرلى ىسىككە قارسى ءتيىمدى ءدارى جاساۋ – مامانداردىڭ ەڭ وزىق جوبالارىنىڭ ءبىرى.