ءبىلىم
ورالدا مەكتەپ اكىمشىلىگى مۇعالىمدەردەن 42 ملن تەڭگە ءوندىرىپ الۋ ءۇشىن سوتقا جۇگىندى
فوتو: istockphoto.com
ورال سوتى باس بۋحگالتەردى كىنالى دەپ تانىدى.
ورال قالاسىندا جالپى ءبىلىم بەرەتىن ورتا مەكتەپ 75 مۇعالىمگە ەڭبەكاقى رەتىندە ارتىق تولەنگەن 42 ملن تەڭگەنى قايتارۋ تۋرالى سوتقا شاعىم تۇسىرگەن, دەپ جازادى qandastar.kz turkystan.kz-كە سىلتەمە جاساپ.
تەرگەۋ ورگانى مەكتەپتىڭ باس بۋحگالتەرىنە قاتىستى قىلمىستىق ءىس قوزعادى. ورال قالالىق سوتىنىڭ شەشىمىمەن ول كىنالى دەپ تانىلىپ, جازا تاعايىندالعان.
قىلمىستىق ءىس اياسىندا مەكتەپكە جۇرگىزىلگەن مەملەكەتتىك اۋديت 2021-2022 جىلدارى 75 مۇعالىمگە 42 ملن تەڭگە ارتىق تولەنگەنىن انىقتادى.
الايدا, سوتتا مەكتەپ اكىمشىلىگىنىڭ وكىلدەرى پەداگوگتاردىڭ قانداي دا ءبىر قۇقىققا قارسى ارەكەتتەر جاساعانىن, سونىڭ سالدارىنان ولارعا ارتىق قاراجات اۋدارىلعانىن دالەلدەيتىن دالەلدەمەلەردى ۇسىنا الماعان.
وسىعان بايلانىستى №2 ورال قالالىق سوتى مەكتەپتىڭ تالاپ قويۋىن قاناعاتتاندىرۋسىز قالدىردى.
سوت جۇمىسقا نەمقۇرايلى قاراۋ نەمەسە بۋحگالتەرلىك قاتەلىك بولماعان جاعدايدا ەڭبەك جانە ازاماتتىق زاڭنامادا كورسەتىلگەندەي, ارتىق تولەنگەن سومانى قايتارۋعا نەگىز جوق ەكەنىن اتاپ كورسەتتى.
