Orman qyzmetkerleriniń jalaqysyna 100% ústemeaqy qosylady

Foto: gov.kz

Búginnen bastap elimizdiń orman jáne tabıǵat qorǵaý mekemeleriniń qyzmetkerleri laýazymdyq jalaqylaryna qaraı 100 paıyz ústemeaqy ala bastaıdy. Tıisti qaýlyǵa Úkimet basshysy Oljas Bektenov qol qoıdy, dep jazady Egemen.kz.

Orman jáne tabıǵat qorǵaý uıymdarynyń qyzmetkerlerine eńbekaqy tóleý júıesin, sharttary men mólsherin jaqsartý maqsatynda «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» Úkimet qaýlysyna ózgerister engizildi.

Qujatqa sáıkes orman órtin sóndirý stansalarynyń, orman mekemeleriniń, tabıǵat qorǵaý jáne orman ornalastyrý uıymdarynyń qyzmetkerleri laýazymdyq jalaqylaryna 100%-ǵa deıin ústemeaqy alady. Olardyń ishinde orman órtin sóndirýshiler, órt sóndirý mashınalarynyń júrgizýshileri, traktorshy-mashınıster, radıooperatorlar, órt sóndirý mashınalaryn, jabdyqtary men apparatýralaryn jóndeıtin slesarlar, órt-baqylaý munarasynyń baqylaýshylary bar.

Sondaı-aq 113 avıaııalyq kúzet órt sóndirýshi-desantshysynyń jalaqysy kóbeıedi.

Qaýlyny iske asyrýǵa 2024-2027 jyldarǵa arnalǵan respýblıkalyq bıýdjetten 8 480,1 mln teńge kóleminde qarjylyq shyǵyndar eseptelgen.

Barlyǵy 3,3 myńǵa jýyq qyzmetker qosymsha aqymen qamtylady.

Jergilikti atqarýshy organdardyń orman sharýashylyǵy mekemeleriniń orman órt sóndirý stansalarynyń 1619 qyzmetkerine qosymsha aqy jergilikti bıýdjet qarajaty esebinen tólenedi.