«О́TE QIYN KÚNDERDI BASTAN О́TKERIP JATYRMYZ»

Reseıde Orynbor men Qorǵanda tasqyn sýdyń deńgeıi qaýipti mejeden asty. Mamandar osylaı dep dabyl qaǵyp otyr. Qutqarýshylar brıgadasy turǵyndardy tynymsyz evakýaııalaýda.

Al Orskide sýdyń deńgeıi sál tómendegen. Orynborda Jaıyq ózeniniń deńgeıi 2 saǵatta 6 sm-ge deıin kóterilip, 1 metr 60 sm-ge jetken. Bul qaýipti mejeden 130 sm-ge joǵary deıdi mamandar. Sol sebepti olar kúni-túni kirpik qaqpaı sýdyń mólsherin qatań qadaǵalaýda. Sergeı Salmın, Orynbor qalasynyń meri: – О́te qıyn kúnderdi bastan ótkerip jatyrmyz. О́zendegi sý deńgeıi qaýipti mejege jetti, áli de sý deńgeıiniń artatyn túri bar. Topan sý kóppáterli turǵyn úılerge jaqyndap keledi.

Tasqyndy boldyrmaý úshin tótenshe jaǵdaı mınıstri Aleksandr Kýrenkovtyń sheshimimen Orynborǵa sý quıatyn dambalar jetkizildi. Orynbor qalasynda 550 myń halyq qonystanǵan. Osy kezge deıin qutqarýshylar turǵyndardyń 20 paıyzyn qaýipsiz jerge kóshirip úlgerdi. Olar birinshi kezekte qarttarǵa, ana men balaǵa jedel kómek kórsetip jatyr. Tasııa, Orynbor qalasynyń turǵyny: – Kúni keshe sý basý qaýpi joq edi, beımezgil ýaqytta topan sý úıdi jaıpap ketti. Qajetti zattarymdy jınap júrgenimde, úıden shyǵa almaı qaldym. Vladımır, Orynbor qalasynyń turǵyny: – Keńes úkimeti kezinde 1980, 1986 jyldary osyndaı jaǵdaı tirkelgen edi. Sodan sý tasqyny bolyp, Jaıyq ta, Elek te arnasynan asqan. Bıylǵy tasqyn jyldaǵydan da qıyn bolyp tur. О́ıtkeni buǵan deıin sý deńgeıi 10 metrge jetken emes. Qorǵanda da jaǵdaı alańdatarlyq.

Tobylda sý deńgeıi kóterilip, 12 eldi mekendi basty. 181 turǵyn úı men 281 jer alqaby sý astynda qalǵan. Zverınogolovskoe eldi mekeninde sýdyń deńgeıi 1 metrge jetti. Turǵyndardy evakýaııalaý jalǵasyp jatyr. 4500 adam ýaqytsha baspanaǵa qonystanyp úlgerdi. Onyń 700-i bala. Al jedel kómek kórsetý brıgadasynda 1800-ge jýyq adam qyzmet kórsetýde. Orskide jaǵdaı turaqtalyp keledi. Sońǵy 12 saǵatta sý deńgeıi 24 sm-ge tómendep, 880 sm-di kórsetti. Sý astynda qalǵan úı-jaıdyń sany 6 jarym myńnan asty. 2600-ge jýyq adam evakýaııalanyp, 1300-den astam kisi ýaqytsha úılerge jaıǵasty.