«О́tirik quryltaıshylar men jalǵan qoltańba»: Sot Perızat Qaırat qurǵan qordy taratty

Foto: Instagram Perızat Qaırat

Astana soty ádilet departamentiniń «Biz Birgemiz Qazaqstan 2030» qoǵamdyq birlestigin taratý týraly talap aryzyn qarady. Bul týraly qandastar.kz   Stan.kz aqparat agenttigine silteme jasap habarlaıdy.

Is materıaldaryna sáıkes, atalǵan zańdy tulǵany memlekettik tirkeý 2021 jyldyń 11 qazanynda júrgizilgen.

«Birlestiktiń quryltaıshylary 10 adam. Olardyń aty-jóni quryltaı jınalystarynyń hattamasynda kórsetilgen. Onyń ishinde Perızat Qaırat bar. Qylmystyq isti tergeý barysynda qoljazba saraptamasy júrgizildi. Oǵan sáıkes qujattardaǵy 10 quryltaıshynyń 9-ynyń atynan qoltańbany Perızat Qaırat ózi qoıǵan», – delingen sot habarlamasynda.

Zańdy tulǵa Azamattyq kodekstiń 49-babyna (Zańdy tulǵany taratý negizderi) sáıkes, zańdy tulǵa ony qurý kezinde jiberilgen, joıylmaıtyn sıpattaǵy zań buzýshylyqtarǵa baılanysty jaramsyz dep tanylǵan jaǵdaıda, sot sheshimi boıynsha taratylýy múmkin

“Joǵarǵy Sottyń (Sottardyń salyq zańnamasyn qoldanýdyń keıbir máseleleri týraly) normatıvtik qaýlysynyń 12-tarmaǵyna sáıkes, zańdy tulǵanyń basshysy men quryltaıshysy, ony qurýǵa qatysy joq jeke tulǵa kórsetilip, tirkeý zańdy tulǵany taratý úshin negiz sanalady. Birlestik qurý kezinde anyqtalǵan buzýshylyqtardy eskere otyryp, sot «Biz Birgemiz Qazaqstan 2030″ úkimettik emes uıymyn májbúrlep taratý týraly sheshim qabyldady», –delingen sot habarlamasynda.

Sheshim zańdy kúshine engen joq.

Aıta keteıik, buǵan deıin Perızat Qaırattyń Biz Birgemiz qory májbúrli túrde taratylatyny týraly habarlaǵan edik.

Eske salaıyq, Perızat Qaıratqa múgedek balalarǵa arnalǵan ortalyq salýǵa jınalǵan 22 mıllıon teńgeni jymqyrdy degen aıyp taǵylǵan edi.

“Biz Birgemiz” qorynyń basshysy Perızat Qaırat sý tasqynynan zardap shekkenderge jınalǵan 1,5 mıllıard teńgeni jymqyrdy degen kúdikke ilingen edi. 

Qarjy monıtorıngi agenttiginiń málimetinshe, qaıyrymdylyqqa bólingen qarjynyń negizgi bóligi qymbat sán buıymdary men jyljymaıtyn múlikti satyp alý maqsatyna paıdalanylǵan. Bıyl kóktemde ol elordadaǵy avtosalonnan 88 mıllıon teńgege «Mercedes-Benz S450», 80 mıllıon teńgege «Lexus LX-600» jáne 39 mıllıon teńgege «Haval» avtokólikterin satyp alǵan.