جاڭالىقتار
ءوز باسىم 20 ميلليونعا تاتيتىن جۇمىس اتقارامىن – دەپۋتات باقىتجان بازاربەك
فوتو: باقىتجان بازاربەك. فوتو: t.me/mazhilis_kz
ءماجىلىس دەپۋتاتى باقىتجان بازاربەك ءوزىنىڭ اتقارىپ جۇرگەن جۇمىسىن 20 ميلليون تەڭگەگە باعالادى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
ۇكىمەت ۇيىندە پرەزيدەنت جولداۋىنان كەيىن كۋلۋاردا جينالعان جۋرناليستەر دەپۋتاتتاردان ءبىر پالاتالى پارلامەنت قۇرۋ جايلى پىكىرلەرىن ءبىلدى. ماجىلىس دەپۋتاتى باقىتجان بازاربەك بۇل رەفورمادان تەك ارتىقشىلىق كورەتىنىن جەتكىزدى.
“مەن مۇلدە كەمشىلىك كورىپ تۇرعان جوقپىن. مۇندا قارجىنى ۇنەمدەۋ, زاڭداردى از ۋاقىتتا قابىلداۋ قامتىلعان. بۇل – زاڭ شىعارۋ پروتسەسىنىڭ تيىمدىلىگى, پليۋراليزم, ساياسي ومىرگە, سايلاۋعا قاتىسۋعا مۇمكىندىك”, – دەدى باقىتجان بازاربەك.
قازىر ماجىلىستە – 98, سەناتتا – 50 دەپۋتات بار. جۋرناليستەر دەپۋتاتتان “پرەزيدەنت ۇسىنعان بىر پالاتالى پارلامەنتتە بولاشاقتا قانشا دەپۋتات بولۋى مۇمكىن” دەگەن سۇراق قويدى. باقىتجان بازاربەك جاڭا پارلامەنتتە 120-130 دەپۋتات بولۋى ىقتيمال دەگەن بولجام جاسادى.
دەپۋتات ارتىلعان قارجى ەسەبىنەن پارلامەنت مۇشەلەرىنىڭ جالاقىسىن كوتەرۋگە قاتىستى پىكىر ءبىلدىردى. الايدا ول بۇل ساۋالعا تەك ءوز باسىنا قاتىستى جاۋاپ بەردى.
ء“وز باسىم قىزمەتىمدى اتقارىپ جۇرمىن جانە جەكە ءوزىمنىڭ ويىمشا, مەنىڭ جالاقىم كەم دەگەندە 20 ميلليون بولۋى كەرەك. ويتكەنى مەن 20 ميلليونعا تاتيتىن جۇمىستى اتقارىپ ءجۇرمىن”, – دەدى سەنىمدى تۇردە باقىتجان بازاربەك.
