О́zbekstannan Qyzylordaǵa jol salynýy múmkin

Foto: ashyq derekkóz

Parlament Májilisiniń depýtaty Marhabat Jaıymbetov Májilistiń jalpy otyrysynda Premer-Mınıstrdiń birinshi orynbasary Roman Sklıarǵa «Úshqudyq-Qyzylorda» baǵyty boıynsha avtomobıl jolyn salý boıynsha depýtattyq saýal joldady, dep habarlady Qandastar.kz.

«Ejelden enshiles, tarıhy tamyrlas eki el – Táýelsiz Qazaqstan men О́zbekstan arasyndaǵy saıası, ekonomıkalyq tyǵyz qarym-qatynas jańa kezeńde órbýde. Búgingi tańda eki el arasyndaǵy saýda jáne taýar aınalymy jyldan jylǵa artyp keledi, – delingen saýalda.

Depýtat osyǵan oraı О́zbekstanǵa tóte jolmen barýǵa Qyzylorda oblysynan aqyly avtomobıl jolyn salýdyń mańyzdylyǵy men qajettiligi kún saıyn artyp kele jatqanyn alǵa tartty.

Oǵan birneshe faktor bar. Birinshiden aýylsharýashylyq jáne ónerkásip ónimderin tasymaldaýǵa durys baǵyt bolsa, ol týrızmniń de damýyna áser etedi. Onda О́zbekstannyń Buqara, Samarqan qalalaryna kelgen týrıster saparyn Qyzylordadaǵy Qorqyt babamyzdan bastap, Ulytaý oblystaryna deıin jalǵastyrýǵa múmkindik alady. Osylaısha, bul óńir týrızmin damytýǵa oń serpilis bere alatyn halyqaralyq jol bolady. Al Ulytaý óńiriniń týrıstik áleýeti óte joǵary. Ekinshiden aldaǵy ýaqytta «Qyzylorda-Jezqazǵan» trassasy arqyly Astana qalasyna tikeleı jol qatynasy ashylyp, Reseı Federaııasyna shyǵýǵa múmkindik beredi. Respýblıkalyq mańyzy bar «Samara-Shymkent» avtomobıl jolynan bastaý alyp, Qyzylorda qalasy arqyly О́zbekstan Respýblıkasynyń «Kókaıaz» eldi mekenine deıin, uzyndyǵy 179 km, 2 jolaqty, qozǵalys bóliginiń eni 9 metr quraıtyn II-sanattaǵy avtomobıl joly túsedi. Úshinshiden osy avtomobıl jolynyń qurylysy iske asyrylǵan jaǵdaıda eki el arasyndaǵy avtokólik qatynasyndaǵy araqashyqtyq shamamen 1330 km (Qyzylorda qalasynan eseptegende) qysqaryp, saýda aınalymynyń kólemi birneshe esege ósetin bolady, – dedi M.Jaıymbetov.

Májilis depýtaty joǵaryda aıtylǵan máselelerdi eskere kele, «Úshqudyq (О́R) – Qyzylorda (QR)» baǵyty boıynsha avtomobıl jolyn salý jobasyn kezek kúttirmeı bastaý qajet dep esepteıdi.