О́zine qol jumsaǵan Almaty ýnıversıtetiniń stýdenti eks-sheneýniktiń uly bolyp shyqty

Foto: Vıdeodan skrın

Kúni keshe Almaty Management University baspasóz qyzmeti stýdenttiń ózine qol jumsaǵany týraly aqparatty rastady. Marqum stýdent Nursultan Nazarbaevtyń baspasóz hatshysynyń burynǵy orynbasary Bolat Bersebaevtyń uly bolyp shyqty. Bul týraly qandastar.kz Stan.kz aqparat agenttigine silteme jasap habarlaıdy.

Jýrnalıst Bıgeldi Ǵabdýllın óziniń áleýmettik jelidegi paraqshasynda Bolat Bersebaevqa kóńil aıtty.

«Bolat Bersebaevqa jáne onyń jaqyn týystaryna AlmaU ýnıversıtetinde oqıtyn uly Dáýlettiń qazasyna baılanysty qaıǵysyna ortaqtasyp kóńil aıtamyn», – dep jazdy jýrnalıst.

Bolat Bersebaev KazTAG aqparat agenttiginiń ıeleri Seıtqazy men Áset Mataevtardyń atyshýly isinde kýáger boldy. Ol buǵan deıin Aqparattandyrý jáne baılanys komıtetiniń tóraǵasy qyzmetin atqardy. Sotta ol shynymen de, ókilettiligin asyra QazTAG-pen kelisim jasasqanyn, biraq eshqandaı jaýapkershilik arqalamaıtynyn málimdedi. Seıitqazy jáne Áset Mataevtar tıisinshe 5 jáne 6 jylǵa sottalyp, 2022 jyly Joǵarǵy sot olardy tolyǵymen aqtap shyqty.

Memlekettik qyzmetten ketkennen keıin Bolat Bersebaev «Sana» Saıası-áleýmettik tehnologııalar ortalyǵy» JShS tirkep, mansabyn saıasattanýshy retinde jalǵastyrdy.

Bolat Bersebaevtyń eńbek jolyna úńilsek, ol 2008 jyldary Prezıdent baspasóz hatshysynyń orynbasary, Aqparat jáne muraǵat komıtetiniń tóraǵasy, 2008-2010 jyldary «Arna medıa» ulttyq holdınginiń basqarýshy dırektory jáne Prezıdent Ákimshiliginde memlekettik ınspektor bolyp qyzmet atqarǵan. 2014 jyldary «NUR-Medıa» JShS Bas dırektor retinde taǵaıyndalǵanǵa deıin Bolat Bersebaev «Nur Otan» partııasy Hatshysynyń mindetin atqarýshy laýazymynda qyzmette boldy, «Nur-Medıa» JShS Qadaǵalaý keńesin basqardy. Keıin «Nur-Medıa» holdıngin buǵan deıin basqarǵan Erlan Baıjanovtyń basqa qyzmetke aýysýyna baılanysty ol laýazymynan bosatyldy.