پاراسپورتشى نىشان ءومىرالىنىڭ نەدەن قايتىس بولعانى بەلگىلى بولدى

جامبىل وبلىسىنىڭ پوليتسيا دەپارتامەنتى پاراسپورتشىنىڭ جول اپاتىنان قايتىس بولعانىن مالىمدەدى.

2024 جىلعى 1 قازاندا ساعات 22:15-تە رەسپۋبليكالىق ماڭىزى بار «باتىس ەۋروپا – باتىس قىتاي» اۆتوجولىنىڭ 542-شاقىرىمىندا Nissan Maxima ماركالى اۆتوكولىكتىڭ جۇرگىزۋشىسى تۇركىستان وبلىسىنان تاراز باعىتىنا قاراي ءجۇرىپ بارا جاتىپ, جولدا تۇيەمەن سوقتىعىسقان.

اۆتوكولىك سالونىندا جۇرگىزۋشى عانا بولعان. جول-كولىك وقيعاسى سالدارىنان ەر ادام العان دەنە جاراقاتتارىنان تاراز قالاسىنىڭ №1 قالالىق اۋرۋحاناسىنا جەتكىزۋ كەزىندە قايتىس بولدى. پوليتسيا قىزمەتكەرلەرى قازاقستان رەسپۋبليكاسى قىلمىستىق كودەكسىنىڭ 345-بابىنىڭ 3-بولىگى بويىنشا سوتقا دەيىنگى تەرگەۋ باستادى. اۆتوكولىك ارنايى ايىپپۇل تۇراعىنا قويىلدى. جانۋاردىڭ يەسىن جاۋاپكەرشىلىككە تارتۋ ماقساتىندا ىزدەستىرۋ جۇمىستارى جۇرگىزىلۋدە, – دەپ جاۋاپ بەردى پوليتسيا دەپارتامەنتى Tengri Sport سۇراۋىنا.

نىشان ءومىرالى – تاراز قالاسىنىڭ تۋماسى ەدى. 17 جاسىنان باستاپ سپورتپەن اينالىسىپ, بۇگىنگە دەيىن ەكى دۇركىن الەم چەمپيونى, ازيا چەمپيونى اتاندى. سونىمەن قاتار ازيا ويىندارىنىڭ جانە كوپتەگەن حالىقارالىق جارىستاردىڭ جۇلدەگەرى. 2021 جىلى توكيودا, وسى جازدا پاريجدە وتكەن پاراليمپيادا ويىندارىنا قاتىستى.

پاراسپورتشىنىڭ ارتىندا جارى مەن ءۇش بالاسى قالدى.