پاريج وليمپياداسى: ءدۇبىرلى دودا باستالدى

پاريج وليمپياداسىنىڭ اشىلۋ سالتاناتى جازعى وليمپيادا ويىندارى تاريحىندا تۇڭعىش رەت ستاديوندا ەمەس, تابيعات اياسىندا, ياعني سەنا وزەنىنىڭ بويىندا ءوتىپ جاتىر. وسىلايشا, فرانتسۋزدار ءدۇبىرلى دودا باستالماي جاتىپ وليمپيادانىڭ ەرەكشەلىكتەرگە تولى بولاتىنىن ۇقتىردى.

بۇعان دەيىن سالتاناتتى ءراسىمنىڭ شوۋ-دۋمان جاعىن باسقارۋشى مامان توني ەستانگە France Press اقپارات اگەنتتىگىنە بەرگەن سۇحباتىندا: «سپورت مەرەكەسىنىڭ اشىلۋ سالتاناتىن وزەندە ۇيىمداستىرۋ – ستاديوندا وتكىزۋگە قاراعاندا اناعۇرلىم كۇردەلى. الايدا مۇنىڭ كورەرمەنگە اسەرى مۇلدە بولەك بولاتىنى ءسوزسىز. ءبىز ءۇشىن ەڭ ماڭىزدىسى وسى», – دەگەن ەدى.

شىنىمەن دە, پاريج شاھارىن قاق جارىپ وتەتىن سەنا وزەنىنىڭ بويىندا ۇيىمداستىرىلعان سالتاناتتى اشىلۋ ءراسىمى كوپشىلىكتى ەرەكشە سەزىمگە بولەپ جاتىر. قوس جاعالاۋعا جينالعان 500 مىڭعا جۋىق كورەرمەن بىلاي تۇرسىن, تەلەديداردىڭ ار جاعىنداعى سپورت سۇيەر قاۋىم «بارەكەلدى!» دەسىپ جاتقانى انىق.

سالدەن سوڭ سپورتشىلار شەرۋىندە ءار دەلەگاتسيا جەكە-جەكە قايىقپەن وزەن بويىمەن ءجۇرىپ وتەدى. شەرۋ 6 شاقىرىمعا سوزىلىپ, تروكادەرونىڭ الدىندا اياقتالادى. وندا سالتاناتتى ءىس-شارانىڭ قالعان بولىگى جانە شوۋ وتەدى.

ءۇش ساعاتقا سوزىلاتىن اشىلۋ سالتاناتىنا 3 مىڭعا جۋىق ءبيشى, ءانشى, ارتيست قاتىسادى. اشىلۋ ءراسىمىنىڭ جارتىسىنان استامى كۇن شىعىپ تۇرعاندا وتسە, ال قاراڭعى تۇسكەن سوڭ ۇيىمداستىرۋشىلار عالامات جارىق شوۋمەن تاڭعالدىرماق.

ەستەرىڭىزگە سالساق, بۇعان دەيىن پاريج وليمپياداسىنىڭ اشىلۋ سالتاناتىنا قانشا قازاقستاندىق قاتىساتىنىن جازعان ەدىك.