الەم جاڭالىقتارى
پاريج وليمپياداسىندا كوزگە تۇسكەن مەرگەن سۇحبات ءۇشىن قوماقتى گونورار سۇراعان
فوتو: اشىق دەرەككوز
2024 جىلى پاريج وليمپياداسىندا ەرەكشە ستيلىمەن كوزگە تۇسكەن تۇرىك مەرگەنى يۋسۋف ديكەچ ءوزىنىڭ تانىمالدىعى ءۇشىن دە قىرۋار قارجى تاباتىنى بەلگىلى بولدى. ول ەندى جاي عانا سپورتشىلىعىنان بولەك, مەديا جانە كينو الەمىنىڭ جاڭا جۇلدىزى رەتىندە تابىستى كەيىپكەرگە اينالعان, دەپ جازدى qandastar.kz
يۋسۋف جۋرناليستەرمەن سۇحبات بەرۋدىڭ دە جاڭا ستاندارتىن ورناتىپ ۇلگەرىپتى. ونىڭ اگەنتىنىڭ مالىمدەۋىنشە, سپورتشى سۇحباتقا كەلىسۋ ءۇشىن 30 مىڭ ەۋرو (16,2 ملن تەڭگە) تولەۋدى قاجەت ەتەدى.
«ول قازىر كەلەسى وليمپياداعا دايىندىق ۇستىندە جانە بوس ۋاقىتى جوق. يۋسۋف سپورتشى بولعاندىقتان وعان مەديا مۇلدەم قىزىق ەمەس. سوندىقتان مۇنداي سۇحباتتاردىڭ باعاسى دا وسىعان سايكەس بولۋى كەرەك», – دەدى اگەنت.
2028 جىلى اقش-تا وتەتىن وليمپياداعا 55 جاسىندا قاتىسۋعا نيەتتى يۋسۋف ديكەچ ەگدە تارتقانىنا قاراماستان جوعارى ناتيجەدەن ءۇمىتتى.
يۋسۋفتىڭ وليمپيادادان كەيىنگى تانىمالدىعى وعان جاڭا مۇمكىندىكتەر اشتى. تۇرىك مەرگەنى بريتاندىق ايگىلى «دەن شاكالا» سەريالىنىڭ جارناماسىنا دا تۇسكەن. جاڭا ماۋسىمدا يۋسۋفتىڭ وبرازى — كاسىبي كيللەردىڭ بۇركەمەلەنگەن تۇلعاسى رەتىندە سيپاتتالىپ ءجۇر. سەريالدىڭ اۆتورلارى ديكەچتىڭ وليمپيادادا قالىپتاسقان بەينەسىن ءساتتى پايدالانىپ, جارنامادا ەرەكشە قىزىعۋشىلىق تۋدىرا ءبىلدى.
تۇرىك سپورتشىسىنىڭ بىلتىر وتكەن وليمپياداداعى وبرازى الەم جۇرتشىلىعىنىڭ ەسىندە ۇمىتىلماستاي بولىپ قالدى. جەڭىل سپورتتىق فۋتبولكا, جارىس كەزىندە قۇلاعىنا وتە قاراپايىم قۇرال تاعىپ, كوزىنە كۇندەلىكتى ومىردە پايدالاناتىن كوزىلدىرىك كيگەن ونىڭ بولمىسى سپورتشىدان گورى تۋريستكە قاتتى ۇقساعان بولاتىن. سوعان قاراماستان ول جەڭىل ءارى ەركىن تۇردە جارىستا سىنعا ءتۇسىپ, كۇمىس جۇلدەگە قول جەتكىزدى.
