Parıj Olımpıadasynda kózge túsken mergen suhbat úshin qomaqty gonorar suraǵan

Foto: ashyq derekkóz

2024 jyly Parıj Olımpıadasynda erekshe stılimen kózge túsken túrik mergeni Iýsýf Dıkech óziniń tanymaldyǵy úshin de qyrýar qarjy tabatyny belgili boldy. Ol endi jaı ǵana sportshylyǵynan bólek, medıa jáne kıno áleminiń jańa juldyzy retinde tabysty keıipkerge aınalǵan, dep jazdy qandastar.kz

Iýsýf jýrnalıstermen suhbat berýdiń de jańa standartyn ornatyp úlgeripti. Onyń agentiniń málimdeýinshe, sportshy suhbatqa kelisý úshin 30 myń eýro (16,2 mln teńge) tóleýdi qajet etedi.

«Ol qazir kelesi Olımpıadaǵa daıyndyq ústinde jáne bos ýaqyty joq. Iýsýf sportshy bolǵandyqtan oǵan medıa múldem qyzyq emes. Sondyqtan mundaı suhbattardyń baǵasy da osyǵan sáıkes bolýy kerek», – dedi agent.

2028 jyly AQSh-ta ótetin Olımpıadaǵa 55 jasynda qatysýǵa nıetti Iýsýf Dıkech egde tartqanyna qaramastan joǵary nátıjeden úmitti.

Iýsýftyń Olımpıadadan keıingi tanymaldyǵy oǵan jańa múmkindikter ashty. Túrik mergeni brıtandyq áıgili «Den shakala» serıalynyń jarnamasyna da túsken. Jańa maýsymda Iýsýftyń obrazy — kásibı kıllerdiń búrkemelengen tulǵasy retinde sıpattalyp júr. Serıaldyń avtorlary Dıkechtyń Olımpıadada qalyptasqan beınesin sátti paıdalanyp, jarnamada erekshe qyzyǵýshylyq týdyra bildi.

Túrik sportshysynyń byltyr ótken Olımpıadadaǵy obrazy álem jurtshylyǵynyń esinde umytylmastaı bolyp qaldy. Jeńil sporttyq fýtbolka, jarys kezinde qulaǵyna óte qarapaıym qural taǵyp, kózine kúndelikti ómirde paıdalanatyn kózildirik kıgen onyń bolmysy sportshydan góri týrıstke qatty uqsaǵan bolatyn. Soǵan qaramastan ol jeńil ári erkin túrde jarysta synǵa túsip, kúmis júldege qol jetkizdi.