پاۆلودار وبلىسىندا 12 جاستاعى قىز بوساندى

فوتو: pixabay.com

پاۆلودار وبلىسى شارباقتى اۋدانىندا 19 شىلدەدە 12 جاستاعى قىز بوساندى. اقپاراتتى Massaget.kz تىلشىسىنە پاۆلودار وبلىسىنىڭ ءبىلىم بەرۋ باسقارماسى راستادى.

ۆەدومستۆو مالىمەتىنشە, وقۋشى تامىزدا 13 جاسقا تولادى.

«مەكتەپ ديرەكتورى جۇمىستان كەتۋ تۋرالى ارىز جازۋىنا بايلانىستى قىزمەتىنەن بوساتىلدى. ءبىلىم ءبولىمىنىڭ باسشىسىنا قاتاڭ سوگىس بەرىلدى», – دەپ جازىلعان پاۆلودار وبلىسى ءبىلىم بەرۋ باسقارماسىنىڭ جاۋابىندا.

وقۋشى پاۆلودار وبلىستىق پەريناتالدىق ورتالىعىندا بوسانعان. ومىرگە قىز بالا اكەلگەن. ال وقۋشىنىڭ جۇكتىلىگىن ءبىرىنشى مۇعالىمدەر بايقاعان.

وقۋشى زورلانعاننان كەيىن جۇكتى بولعان. بالالار ومبۋدسمەنى دينارا زاكيەۆانىڭ ايتۋىنشا, قازىر تەرگەۋ جۇرگىزىلىپ جاتىر.

«قىلمىستىق ءىس تەرگەلىپ, سوت-پسيحياتريالىق ساراپتاما جۇرگىزىلىپ جاتىر», – دەدى زاكيەۆا.

قازىر ءسابي اناسىمەن بىرگە.

Massaget.kz ءوڭىردىڭ پوليتسيا دەپارتامەنتىنە رەسمي ساۋال جولدادى.

ايتا كەتەيىك, وڭىرلەردە مۇنداي وقيعالار تىيىلماي تۇر. رەداكتسيا وسى جانە وزگە دە وسىعان ۇقساس جاعدايلاردى انىقتاۋ ماقساتىندا وقۋ-اعارتۋ مينيسترلىگىنە جۇگىندى. مينيسترلىكتىڭ رەسمي جاۋابى الداعى ۋاقىتتا جاريالانادى.

ەسكە سالايىق, بۇعان دەيىن شىمكەنتتە دە كامەلەتكە تولماعان 73 قىز جۇكتى بولىپ قالعانى حابارلاندى.