Perızat Qaırat sotynda kýáger qordyń nelikten PlayStation-klýb mekenjaıynda tirkelgenin túsindirdi

Foto: Birinshisi KTK arnasynan / Perızat Qaırat. Ekinshisi Sergeı Matıýshenkonyń jelidegi paraqshasynan

Astanadaǵy qylmystyq ister jónindegi aýdanaralyq sotta Biz Birgemiz Qazaqstan qaıyrymdylyq qorynyń basshysy Perızat Qaıratqa qatysty atyshýly is boıynsha sot otyrysy jalǵasyp jatyr. 14 shildede kýáger Sergeı Matıýshenkonyń jaýaptary tyńdaldy, dep jazdy qandastar.kz

Ol qordyń tirkelý barysy men onyń «Amanat» partııasynyń «Jas Otan» jastar qanatymen baılanysy týraly aıtyp berdi. Bul týraly Stan.kz aqparat agenttigi habarlaıdy.

Matıýshenko Perızatpen «Jas Otan» uıymy aıasyndaǵy qyzmet barysynda tanysqanyn, al qor qurý ıdeıasy sol kezdegi partııa tóraǵasynyń orynbasary Baýyrjan Baıbektiń bastamasymen eriktiler qozǵalysyn uıymdastyrý týraly jınalysta kóterilgenin jetkizdi. Alaıda ol bul eriktiler qozǵalysyn bólek zańdy tulǵa retinde tirkeý týraly sóz bolmaǵanyn aıtty.

Matıýshenkonyń aıtýynsha, Perızat Qaırat odan qordy tirkeýge kómek suraǵan. Ol aǵasynyń PlayStation klýbynyń mekenjaıyn ýaqytsha zańdy mekenjaı retinde usynǵanyn rastady. Keıinirek partııanyń ortalyq apparaty ornalasqan Qonaev kóshesi, 12/2 mekenjaıyna qaıta tirkeý josparlanǵan edi, biraq bul jospar iske aspaǵan deıdi ol.

Buǵan deıin prokýratýra qordyń zańdy mekenjaıynda oıyn klýby ornalasqanyn habarlaǵan edi. Matıýshenko óz sózinde qordyń qarjylyq-sharýashylyq qyzmetine esh qatysy bolmaǵanyn jáne ony kim júrgizgenin bilmeıtinin málimdedi.

Sottaǵy mańyzdy kezeń jalǵan qujattar máselesi boldy. Prokýratýranyń málimetinshe, 2021 jylǵy 14 qyrkúıekte Perızat Qaırat on adam, onyń ishinde Matıýshenko bar, qor qurýǵa kelisim berip, jınalys ótkizdi dep jalǵan hattama jasaǵan. Tergeý bul hattamadaǵy qoltańbalardyń jalǵan ekenin dáleldep jatyr. Matıýshenko da bul derekti rastady.

«Men ekinshi hattamany kózimmen kórdim. Ol meniń qoltańbam emes», – dedi ol.

Sondaı-aq ol Halyqqa qyzmet kórsetý ortalyǵynda qujattardy tapsyrýǵa barmaǵanyn aıtty. Sot otyrysynda Perızat Qaırat kóz jasyn tyıa almaı, kýágermen dıalogqa tústi.

Perızat Qaırat «О́kinishti, osynda jolyǵamyz dep oılamadym. Sen ekinshi hattamany qol qoımaǵanyńdy rastaısyń ba?» dep surady.

Sergeı Matıýshenko: «Iá, rastaımyn. Men qol qoıǵan joqpyn».

Perızat Qaırat: «Sen ótirik aıtyp turǵan joqsyń ba?»

Sergeı Matıýshenko: «Joq, ótirik emes».

Perızat Qaırat: «Sen túsinesiń be, meniń taǵdyrym sheshilip jatyr».

Sergeı Matıýshenko: «Perızat, men óz kózimmen kórdim, ol meniń qoltańbam emes».

Aıyptalýshy kýágerdiń sózin birneshe ret bólip, naqtylaýshy suraqtar qoıdy. Sol sátte sýdıa Karımov taraptardy tártipke shaqyryp, aıyptalýshyǵa eskertý jasady.

«Aıyptalýshy, sizge túske deıin eki ret túsindirdim. Suraqtaryńyzdy qoıyńyz, jaýaptaryn tyńdańyz, sosyn kelesi suraqqa kóshińiz. Qazir siz ózińizge yńǵaıly jaýap alǵyńyz keletindeı áser qaldyryp otyrsyz. Sot otyrysynyń óz tártibi bar. Kýáger shyn sóılep jatyr ma, joq pa ony sot anyqtaıdy. Munda emoııaǵa berilip, daýysty kóterýdiń qajeti joq», – dedi sýdıa.

Perızat Qaırat bul sózge qarsy shyǵyp, «Daýysymdy kótergen joqpyn» dep jaýap berdi.

Matıýshenko Perızat Qaırattyń buǵan deıin kópshilik aldyndaǵy júris-turysyna da toqtaldy. Onyń aıtýynsha, Perızat áleýmettik jelide qordyń jumysy jaıly belsendi jazyp otyrǵan. Sondaı-aq ol Perızattyń Toyota Camry 70 kóligimen júrgenin, al 2024 jylǵy sý tasqynynan keıin jáne ShYU sammıti kezinde aq tústi Mercedes-Benz kóligimen júrgenin aıtqan.

Qor arqyly jınalǵan qarjynyń maqsaty týraly ol Perızattyń jarııalanymdaryna súıene otyryp, qarjy Qazaqstandaǵy sý tasqynynan zardap shekkenderge, Palestına halqyna, Túrkııadaǵy jer silkinisinen zardap shekkenderge kómek retinde jınalǵanyn jetkizdi.

Eske salaıyq, 14 shildede Perızat Qaırat pen onyń anasy Ǵaını Alashbaevaǵa qatysty alǵashqy sot otyrysy ótti. Perızat Qaırat alaıaqtyq pen aqsha jymqyrý aıyptaryn moıyndamaı, tergeý men aıyptaýdy prokýrorlardyń qııalyna teńedi. Perızat Qaırat Baıbektiń aty-jónin atady jáne qordyń quryltaıshylaryn sotta tyńdaýdy surady. Sotta kýáger retinde sóz sóılegen Móldir Súıinshiáli óziniń Perızatpen baılanysy úshin BAQ-tan «betke shapalaq» alǵanyn aıtty. Ol sondaı-aq Perızat Qaırat uıymdastyrǵan aýkıonda Golovkınniń qolǵabyn 10 mıllıon teńgege satyp alyp, DP-men aýyratyn balalarǵa arnalǵan ońaltý ortalyǵynyń qurylysyna aqsha aýdarǵanyn aıtty. Móldir Súıinshiáli Perızattyń bir muqtaj áıelge páter syılaǵanyn, alaıda keıin ol úıdiń naqty ómirde joq ekeni anyqtalǵanyn jetkizdi. Aıtpaqshy, Perızat Qaırattyń Kembrıdjde oqymaǵany jáne joǵary bilimi bolmaǵany da sotta belgili boldy.