پەريزات قايراتقا قاتىستى تاعى ءبىر تىڭ دەرەك شىقتى

فوتو:ينستاگرام

باسى داۋعا قالعان قايىرىمدىلىق قوردىڭ جەتەكشىسى پەريزات قايراتقا قاتىستى قىلمىستىق ءىس الداعى كۇندەرى پروكۋراتۋراعا, سودان كەيىن سوتقا جولدانادى, دەپ جازادى qandastar.kz

بۇعان دەيىن قارجى مونيتورينگى اگەنتتىگى (قما) پەريزات قايراتتىڭ قىلمىستىق ءىس ماتەريالدارىمەن تانىسۋ پروتسەسىن ادەيى سوزىپ جۇرگەنىن مالىمدەگەن بولاتىن. سول سەبەپتى وعان 9 ماۋسىمعا دەيىن مەرزىم بەرىلگەن ەدى.

قما توراعاسىنىڭ ورىنباسارى جەڭىس ەلەمەسوۆ جۋرناليستەرگە بەرگەن سۇحباتىندا كۇدىكتىنىڭ بەلگىلەنگەن مەرزىمگە ۇلگەرگەنىن حابارلادى:

«ءىس ماتەريالدارىمەن تانىسۋ اياقتالدى. قازىر بىزدەن كەلىپ تۇسكەن وتىنىشتەر مەن ولارعا جاۋاپتاردى جيناقتاپ جاتىرمىز. جاقىن كۇندەرى ءىستى پروكۋراتۋراعا تاپسىرامىز, سودان سوڭ — سوتقا جىبەرەمىز», — دەدى ول.

ەسكە سالايىق, پەريزات قايرات پەن ونىڭ اناسى عايني الاشباەۆاعا كۇدىك كەلتىرىلىپ وتىر. جابىرلەنۋشىلەر سانى — 100-دەن استام ادام.

پەريزات ءۇش جارىم ميلليارد تەڭگەنى جىمقىردى دەپ ايىپتالۋدا. بۇل قاراجات سۋ تاسقىنىنان زارداپ شەككەن قازاقستاندىقتارعا جانە سوعىس قۇربانى بولعان پالەستينالىقتارعا كومەك رەتىندە جينالعان.

سونداي-اق, ءىس ماتەريالدارىندا مۇمكىندىگى شەكتەۋلى بالالارعا ارنالعان وڭالتۋ ورتالىعىن اشۋعا جينالعان قاراجات تۋرالى دا ايتىلادى.