Perızat Qaıratqa qatysty taǵy bir tyń derek shyqty

Foto:ınstagram

Basy daýǵa qalǵan qaıyrymdylyq qordyń jetekshisi Perızat Qaıratqa qatysty qylmystyq is aldaǵy kúnderi prokýratýraǵa, sodan keıin sotqa joldanady, dep jazady qandastar.kz

Buǵan deıin Qarjy monıtorıngi agenttigi (QMA) Perızat Qaırattyń qylmystyq is materıaldarymen tanysý proesin ádeıi sozyp júrgenin málimdegen bolatyn. Sol sebepti oǵan 9 maýsymǵa deıin merzim berilgen edi.

QMA tóraǵasynyń orynbasary Jeńis Elemesov jýrnalısterge bergen suhbatynda kúdiktiniń belgilengen merzimge úlgergenin habarlady:

«Is materıaldarymen tanysý aıaqtaldy. Qazir bizden kelip túsken ótinishter men olarǵa jaýaptardy jınaqtap jatyrmyz. Jaqyn kúnderi isti prokýratýraǵa tapsyramyz, sodan soń — sotqa jiberemiz», — dedi ol.

Eske salaıyq, Perızat Qaırat pen onyń anasy Ǵaını Alashbaevaǵa kúdik keltirilip otyr. Jábirlenýshiler sany — 100-den astam adam.

Perızat úsh jarym mıllıard teńgeni jymqyrdy dep aıyptalýda. Bul qarajat sý tasqynynan zardap shekken qazaqstandyqtarǵa jáne soǵys qurbany bolǵan palestınalyqtarǵa kómek retinde jınalǵan.

Sondaı-aq, is materıaldarynda múmkindigi shekteýli balalarǵa arnalǵan ońaltý ortalyǵyn ashýǵa jınalǵan qarajat týraly da aıtylady.