«پەرزەنتحانادا 4-5 كۇن ەمىزىپ, اق ءسۇتىن بەرگەن انانى تاپتىق». جانىبەكتى ساتىپ جىبەرگەن ادامنىڭ كىم ەكەنى بەلگىلى بولدى

«پەرزەنتحانادا 4-5 كۇن ەمىزىپ, اق ءسۇتىن بەرگەن انانى تاپتىق». جانىبەكتى ساتىپ جىبەرگەن ادامنىڭ كىم ەكەنى بەلگىلى بولدى
اناسىن ىزدەپ جۇرگەن قازاق بالاسى جانىبەك. سۋرەت «1001 ءتۇن» باعدارلاماسىنىڭ سكرينشوتى
قىمبات دوسجان جانىبەكتى بەلگيالىق ازاماتشاعا ساتىپ جىبەرگەن ادامدى قازىر پوليتسيا تەرگەپ جاتقانىن ءمالىم ەتتى
«قازاقستان» ۇلتتىق تەلەارناسىنىڭ «1001 ءتۇن» باعدارلاماسىنا قوناققا كەلگەن جۋرناليست قىمبات دوسجان مەن يسپانيادا تۇراتىن قازاق بالاسى جاني ساۆەلەۆ ونىڭ اناسىن ىزدەۋگە قاتىستى تىڭ دەرەكتەردى ايتتى, دەپ حابارلايدى jambylinfo.kz.

قىمبات دوسجان «ۇلكەن ءبىر ۇجىم جانىبەكتىڭ اناسىن ءالى تابا الماي جاتىر» دەگەن سىنعا قاتىستى پىكىرىن ءبىلدىردى. ونىڭ ايتۋىنشا, جانىبەكتىڭ اناسىن ىزدەگەن شاعىن عانا راديوۇجىم ءبىر اپتانىڭ ىشىندە ۇلكەن جۇمىستاردى اتقارعان.

«جانىبەك 2023 جىلدىڭ جەلتوقسان ايىندا قازاقستانعا اياعىن باسقاننان باستاپ, ەڭ العاش «انامدى ىزدەيمىن» دەپ ۆيدەو جاريالاعاننان باستاپ قازاقستاننىڭ تەڭ جارتىسى قوسا جىلادى, قوسا ىزدەدى. ءدال قازىر «اياداي عانا ارقالىقتان نەگە تابا الماي جاتىرسىڭدار» دەگەن سۇراقتار كوبەيىپ جاتىر. ال, جەلتوقسان ايىندا قانداي جۇمىس ىستەگەنىمىزدى ايتساق, ءبىز ءبىر اپتانىڭ ىشىندە وسى جانىبەكتى تۋعاننان كەيىن ءتورت-بەس كۇن بويى پەرزەنتحانادا جاتىپ, ەمىزىپ, اق ءسۇتىن بەرگەن انانى تاپتىق. باس اياعى ءبىر اپتانىڭ ىشىندە تاپتىق», — دەيدى قىمبات دوسجان.

بىراق, قىمبات دوسجان ول ادامنىڭ قولحاتى بار بولسا دا, ساراپتاما جاسالسا دا, دنق ساراپتاماسى «ءنول» بولعانىن ايتادى.

«بولجامدى انا قۇجات بويىنشا سول ايەل, سول ايەلدىڭ ەسىمىمەن ەكىنشى بالاسىن دۇنيەگە اكەلگەن انانى تاپتىق. ەكى بىردەي تاپسىرعان اناليز ءنول بولىپ شىقتى. جازىپ كەتكەن قولحاتىنا دەيىن تاپتىق. ونىڭ «ۇيىمە بارىپ, شارۋالىرىمدى ءبىتىرىپ, تۇنگى ساعات ون شاماسىندا قايتىپ كەلەمىن» دەپ جازىپ كەتكەن حاتىن دا تاپتىق», — دەيدى ول.

بۇل رەتتە قىمبات دوسجان يسپانيادان ءوزىنىڭ تۋعان اناسىن ىزدەپ كەلگەن جانىبەكتى كەزىندە شەتەل اسىرىپ جىبەرگەندەردىڭ ىسىنە قىنجىلىپ, ولار وتە كوپ اقشا العانىن ايتىپ بەردى.

«مەن وتكەن سۇحباتىمدا دا ايتتىم. ايەل ادام (ساتقان ايەل ادام – رەد.) جانىبەك ءۇشىن دەپ بەلگيالىق ازاماتشادان وتە ۇلكەن مولشەردە, مىڭداعان ەۋرو كولەمىندە اقشا العان. كەلىسىممەن, كادىمگىدەي قولىنان ساناپ تۇرىپ العان. ونىڭ ايەل ەكەنىن, سول كەزدە جاس كەلىنشەك بولعانىن, وتباسى بارىن, قازىر جاسى نەشەدە جانە قاي جەردە جۇمىس ىستەيتىنىن, ءبارىن بىلەمىن. قازىر پوليتسيا ول كىسىمەن دە اينالىسىپ جاتىر. ءبىز انا دەيمىز-داعى, ولارعا ءسوز ارنايمىز. ال بالامىزدىڭ شەتەل اسۋىنا, زاڭسىز تۇردە كەتۋىنە تاعى دا انالاردىڭ سەبەپشى بولىپ وتىر», — دەپ قىنجىلدى تەلەجۇرگىزۋشى.

ەستەرىڭىزگە سالا كەتەيىك, 2023 جىلدىڭ سوڭىندا الەۋمەتتىك جەلىگە بەينەۇندەۋ جاريالاعان جاني ساۆەلەۆ ەسىمدى جىگىت ءوزىنىڭ قازاق ەكەنىن, ارقالىقتا دۇنيەگە كەلگەنىن جانە قازىر تۋعان اناسىن ىزدەپ جۇرگەنىن ءمالىم ەتكەن ەدى.