جاڭالىقتار
پەتروپاۆل تۇرعىنى زەينەتكەرلەردى 5 ملن تەڭگەگە الداعان
فوتو: istockphoto
پەتروپاۆلدا 5 ملن تەڭگە كولەمىندە ەكى الاياقتىق دەرەگى بويىنشا كۇدىكتى ۇستالدى, دەپ حابارلايدى Qandastar.kz سايتى Polisia.kz-كە سىلتەمە جاساپ.
پوليتسياعا پەتروپاۆل قالاسىنىڭ 67 جاستاعى تۇرعىنىنان الاياقتىق فاكتىسى بويىنشا ءوتىنىش تۇسكەن. زەينەتكەر الاياققا الدانىپ اقشاسىن بەرىپ جىبەرگەنىن ايتقان.
«وعان ءۇي تەلەفونىنا قوڭىراۋ شالعان ايەل جىلاپ, ءوزىن رەسەيدە تۇراتىن قىزى رەتىندە جول اپاتىنا ۇشىراعانىن, ادۆوكاتقا اقشا قاجەت ەكەنىن ايتقان. سول ساتتە ونىڭ تەلەفونىنا ءوزىن ادۆوكاتپىن دەپ تانىستىرعان الاياق قوڭىراۋ شالىپ, 2 ميلليون تەڭگە كولەمىندەگى اقشانى تاكسي جۇرگىزۋشىسى ارقىلى بەرۋىن سۇراعان», — دەلىنگەن حابارلامادا.
ءبىرازدان سوڭ العاشقى تەلەفون سوققان قايتا حابارلاسىپ, وپەراتسياعا اقشا سۇراعان.
جابىرلەنۋشى نەمەرەسىنە حابارلاسىپ, ەشقانداي جول اپاتى بولماعانىن بىلگەن سوڭ «102» ارناسىنا حابارلاسادى.
«جەدەل-ىزدەستىرۋ ءىس-شارالارىنىڭ ناتيجەسىندە پوليتسەيلەر تاكسي جۇرگىزۋشىسىنەن 2 ميلليون تەڭگە العان دروپپەردى ۇستادى. ول – 24 جاستاعى قالا تۇرعىنى بولىپ شىقتى. ونىڭ تاعى ءبىر وسىنداي الاياقتىق فاكتىسىنە قاتىسى بارىن انىقتادى. بۇل جاعدايدا 88 جاستاعى پەتروپاۆل تۇرعىنى 3 ميلليون تەڭگەسىنەن ايىرىلعان», — دەدى پوليتسيا.
قازىرگى ۋاقىتتا تەرگەۋ امالدارى جۇرگىزىلىپ جاتىر. كۇدىكتىگە ءىرى كولەمدە ايىپپۇلدان باستاپ 4 جىلعا دەيىن باس بوستاندىعىنان ايىرۋ جازاسى قاراستىرىلعان.
