جاڭالىقتار
پەتروپاۆلدا كاسىپكەردىڭ وتباسى ايۋاندىقپەن ولتىرىلگەن
فوتو: اشىق دەرەككوز
سولتۇستىك قازاقستان وبلىسىنىڭ پروكۋراتۋراسى كاسىپكەرلەر وتباسىن ايۋاندىقپەن ءولتىرۋ ىسىنە قاتىستى پىكىر ءبىلدىردى, – دەپ جازادى qandastar.kz
2023 جىلعى جەلتوقساننىڭ اياعىندا پەتروپاۆلدىڭ جۇمىسشىلار اۋىلىندا جەرلەۋ كومپانياسىنىڭ يەلەرى پريحودچەنكولار وتباسى قاتىگەزدىكپەن ءولتىرىلدى. ودان كەيىن كىسى ءولتىردى دەگەن كۇدىكپەن ەكى ەر ادام ۇستالدى. كوپ ۇزاماي پوليتسەيلەر جەرلەۋ ءراسىمىن جاسايتىن ءىرى كومپانيا ديرەكتورىنىڭ ورىنباسارىن ۇستادى.
بيىلعى جىلدىڭ 28 قازانىندا سوت ءبىر ايىپتالۋشىنى ءومىر بويىنا باس بوستاندىعىنان ايىرۋ, ءىس بويىنشا ەكىنشى ايىپتالۋشىنى 21 جىل 8 ايعا باس بوستاندىعىنان ايىرۋ تۋرالى ۇكىم شىعاردى. سوتتالۋشى ايەل ءۇش جىلعا باس بوستاندىعىنان ايىرىلدى. سوت ونىڭ ارەكەتىنەن وزىنە بەلگىلى اسا اۋىر قىلمىس تۋرالى حابارلاماۋدى عانا كورىپ, ال ارانداتۋشىلىققا كىنالى ەكەنىن دالەلدەمەگەن.
«سولتۇستىك قازاقستان وبلىسىنىڭ پروكۋراتۋراسى پريحودچەنكو وتباسىن ءولتىرۋ دەرەگى بويىنشا كوپتەگەن جاريالانىم مەن تۇسىنىكتەمەگە سۇيەنە وتىرىپ, كىنالى E-ءنى ءومىر بويىنا باس بوستاندىعىنان ايىرۋعا, و-نى 21 جىل 8 اي مەرزىمگە باس بوستاندىعىنان ايىرۋعا, س-نى 3 جىلعا باس بوستاندىعىنان ايىرۋعا سوتتالعانىن حابارلايدى. و. جانە س-عا قاتىستى جازانىڭ جەڭىل بولۋىنا بايلانىستى وبلىستىق پروكۋراتۋرا بۇل ۇكىممەن كەلىسپەدى. وسىعان بايلانىستى 2024 جىلعى 12 قاراشادا وبلىستىق سوتقا اپەللياتسيالىق شاعىم ەنگىزىلدى», – دەلىنگەن حابارلامادا.
