جاڭالىقتار
پەتروپاۆلداعى قوقىس پوليگونىندا وق-ءدارى جارىلىپ, 23 جاستاعى جىگىت جاراقات الدى
پەتروپاۆلدا قوقىس پوليگونىنان تاۋىپ العان وق-ءدارى جارىلىپ, 23 جاستاعى جىگىتتىڭ بەتى جارالاندى. كەيبىر مالىمەت بويىنشا, تاجىكستاننان كەلگەن گاستاربايتەردىڭ وڭ جاق سامايى مەن قاباعى زاقىمدانعان, دەپ حابارلايدى Qandastar.kz سايتى turkystan.kz-كە سىلتەمە جاساپ.
كتك ارناسىنىڭ مالىمەتىنشە, وقيعا تۇسكى ءتورت شاماسىندا بولعان. ەكى ەر ازامات تۇرمىستىق قالدىقتاردى توگەتىن پوليگوندا ءجۇرىپ, وقدارى تاۋىپ العان. تەكسەرمەك بولعاندا ول جارىلىپ, جىگىتتىڭ بەتى قانجوسا بولعان.
قازىر پوليتسيا قىزمەتكەرلەرى وسى جايتقا قاتىستى تەرگەپ-تەكسەرۋ جۇرگىزىپ, ءىستىڭ ءمان-جايىن انىقتاپ جاتىر. بەلگىلى بولعانى, وقيعا ورنىندا ەشقانداي اتىس قارۋى قولدانىلماعان. ال جاراقات العان جىگىتتىڭ جاعدايى قازىر جاقساردى دەيدى دارىگەرلەر.
«جاراقات ادام ومىرىنە قاۋىپ توندىرمەيدى. تەك تەرى جانە تەرىاستى ماي قاباتى زاقىمدانعان. كوزىنە, باس سۇيەگىنە ەش زاقىم كەلمەگەن. ناۋقاسقا ءبىزدىڭ بولىمشەدە العاشقى كومەك كورسەتىلىپ, قانىن توقتاتىپ, ۇيىندە ەمدەلۋگە جىبەردىك», – دەدى پەتروپاۆل جەدەل جاردەم اۋرۋحاناسىنىڭ حيرۋرگى باعدات شاعداروۆ.
