جاڭالىقتار
پوليگونداردىڭ جۇمىسىن باقىلاماعان شەنەۋنىكتەرگە 9 ملن تەڭگە ايىپپۇل سالىندى
تۇركىستان وبلىسىنىڭ مامانداندىرىلعان تابيعات قورعاۋ پروكۋراتۋراسى وبلىستاعى تۇرمىستىق قاتتى قالدىقتاردى ساقتايتىن پوليگونداردى تەكسەردى, دەپ حابارلايدى qandastar.kz اقپاراتتىق پورتالى turkystan.kz سايتىنا سىلتەمە جاساپ.
تەكسەرىس بارىسىندا, پوليگونداردىڭ 70 پايىزى سانيتاريالىق-ەكولوگيالىق تالاپتارعا سايكەس كەلمەيتىندىگى انىقتالدى.
ماسەلەن, وبلىس اۋماعىنداعى 135 پوليگون ينفراقۇرىلىممەن قامتاماسىز ەتىلمەگەن (جارىق, قورشاۋ, ارنايى قۇرىلعىلارمەن قارجىلاندىرۋعا بايلانىستى جابدىقتالماعان), 81-ءى سانيتاريالىق-ەپيدەميولوگيالىق قورىتىندىسىز (جان-جاقتى قاراۋ جانە ءتيىستى اكىمشىلىك جاۋاپتىلىققا تارتۋ بويىنشا ماتەريالدار سوتقا جولدانعان), 11-ءى ەكولوگيالىق رۇقسات قۇجاتتارىنسىز جۇمىس ىستەۋدە.
بۇل رەتتە, ورىن العان زاڭ بۇزۋشىلىقتار بويىنشا پروكۋراتۋرا تاراپىنان قاداعالاۋ اكتىسى ەنگىزىلىپ (تۇركىستان وبلىسى بويىنشا ەكولوگيا دەپارتامەنتى مەن سانيتاريالىق- ەپيدەميولوگيالىق باقىلاۋ دەپارتامەنتىنە), ءتيىستى باسشىلارىنا 9 ملن تەڭگەدەن استام ايىپپۇل سالىندى جانە 11 پوليگوننىڭ قىزمەتى ەكولوگيالىق رۇقسات العانشا توقتاتىلدى.
