پوليتسيا جۇمىسىنا كەدەرگى كەلتىرگەندەرگە ايىپپۇل سالىنباق

ىشكى ىستەر مينيسترلىگى كولىك جۇرگىزۋشىلەرىنە ۇندەۋ جاسادى, دەپ حابارلايدى qandastar.kz.

ءىىم مالىمەتىنشە, كەيىنگى كەزدەرى باق پەن الەۋمەتتىك جەلىلەردە پوليتسيا قىزمەتكەرلەرىنەن جەدەل-پروفيلاكتيكالىق ءىس-شارالاردىڭ وتكىزىلۋى تۋرالى قۇجاتتاردى تالاپ ەتىپ, ولاردىڭ جۇمىسىنا كەدەرگى كەلتىرۋ ساتتەرى بەينەلەنگەن ۆيدەولار جاريالانىپ جاتىر.

ءىىم اكىمشىلىك پوليتسيا كوميتەتىنىڭ توراعاسى قايسار سۇلتانباەۆتىڭ ايتۋىنشا, «جول ءجۇرىسى تۋرالى” زاڭدا جانە جول ءجۇرىسى قاعيدالارىندا كولىك قۇرالىن توقتاتۋ كەزىندە پوليتسيا قىزمەتكەرلەرى مەن جۇرگىزۋشىلەردىڭ ءىس-قيمىلىنىڭ ناقتى ءتارتىبى ايقىندالعان.

كولىكتى توقتاتۋ كەزىندە پوليتسيا قىزمەتكەرى ءوزىن تانىستىرىپ, قىزمەتتىك كۋالىگىن كورسەتىپ, توقتاتۋ سەبەبىن ءتۇسىندىرۋى قاجەت.

«جۇرگىزۋشى ءوز كەزەگىندە ىشكى ىستەر ورگاندارى قىزمەتكەرىنىڭ زاڭدى تالاپتارىن ورىنداۋعا مىندەتتى. ال پوليتسيا قىزمەتكەرى جەدەل-پروفيلاكتيكالىق ءىس-شارانىڭ وتكىزىلىپ جاتقانىن راستايتىن قۇجاتتاردى كورسەتۋگە مىندەتتى ەمەس. پوليتسيا قىزمەتكەرىنىڭ زاڭدى تالاپتارىن ورىنداماۋ, قىزمەتتىك مىندەتتەرىن اتقارۋ كەزىندە ونىڭ جۇمىسىنا كەدەرگى كەلتىرۋ 30 ايلىق ەسەپتىك كورسەتكىش مولشەرىندە ايىپپۇل سالۋ نەمەسە 15 تاۋلىككە دەيىن قاماۋعا الۋ تۇرىندەگى اكىمشىلىك جاۋاپكەرشىلىككە اكەپ سوعادى», – دەدى ءىىم اكىمشىلىك پوليتسيا كوميتەتىنىڭ توراعاسى قايسار سۇلتانباەۆ.