Prezıdent: Armııamyz kez kelgen sátte óz mindetin oryndaýǵa saqadaı saı

Foto: Aqorda

Qasym-Jomart Toqaev memlekettik nagradalar, joǵary áskerı jáne arnaýly ataqtar, synyptyq shender tapsyrý rásimine qatysty, dep habarlaıdy qandastar.kz

Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev saltanatty jıynda sardarlar men sarbazdardy aldaǵy Otan qorǵaýshy kúnimen quttyqtady. Sonymen qatar patrıotızm men jaýyngerlik rýhtyń sımvolyna aınalǵan mereke kúnderi elge qorǵan bolyp júrgen azamattarǵa qurmet kórsetý, Otan úshin ot keshken aǵa býynnyń rýhyna taǵzym etý, olardyń janqııarlyǵy men óshpes erligin urpaqtyń jadynda jańǵyrtý dástúrge aınalǵanyn atap ótti.

– Qazaq – bolmysynan jaýjúrek halyq. Batyr babalarymyz keń-baıtaq jerimizdi aq bilektiń kúshimen, aq naızanyń ushymen qorǵady. «Er – eldiń aınasy» deıdi. Shyn máninde, halqymyzdyń erlik dástúri atadan balaǵa jalǵasyp keledi. Qazaq sarbazy qaı kezde de elin qorǵaı bilgen. Jeriniń shetine jaý tıse, judyryqtaı jumylyp bir týdyń astynan tabylǵan. Bıyl Uly Jeńiske 80 jyl tolyp otyr. Adamzat tarıhyndaǵy osyndaı surapyl soǵys barsha elder úshin úlken synaq bolǵany sózsiz. Maıdanǵa bir mıllıon eki júz myńnan astam azamatymyz attandy. Olardyń jartysy urys dalasynan oralǵan joq. Tyl eńbekkerleri kún-tún demeı ter tókti. Osylaısha, halqymyz Uly Jeńiske ólsheýsiz úles qosty. Jeńis merekesi eren erlikti pash etedi. Sondaı-aq beıbit ómirdiń, birlik pen yntymaqtyń mańyzyn uǵyndyrady. Jeńis kúni arqyly urpaqqa beriletin eń basty taǵylym – osy, – dedi Qasym-Jomart Toqaev.

Qasym-Jomart Toqaev Qazaqstannyń kúshtik qurylymdaryn bahadúr babalardyń laıyqty izbasary dep atady.

– Qarýly Kúshter elimizdiń táýelsizdigin, tynyshtyǵy men tutastyǵyn qas qaqpaı kúzetip tur. Quqyq qorǵaý organdary zań men tártipti, arnaýly qyzmetter ulttyq qaýipsizdikti qamtamasyz etip keledi. Qutqarýshylar el-jurttyń amandyǵy úshin aıanbaı eńbek etip júr. Byltyr biz Birikken Ulttar Uıymynyń bitimgerlik mıssııasyn alǵash ret derbes oryndaýǵa kiristik. Bul qadam halyqaralyq qaýymdastyqtyń Qazaqstan armııasyna senimi joǵary ekenin kórsetedi. Biz – beıbit memleketpiz. Barlyq elmen dostyq qatynas ornattyq. Daýly máseleniń bárin saıası dıalog arqyly sheshý kerek dep sanaımyz. Men bul Qazaqstannyń myzǵymas ustanymy ekenin únemi aıtyp júrmin. Degenmen qamsyz otyrýǵa bolmaıdy. Armııamyz kez kelgen sátte óz mindetin oryndaýǵa saqadaı saı turýǵa tıis, – dedi Memleket basshysy.