پرەزيدەنت «بارىس» حوككەي كلۋبىنا قاتىستى شاعىمعا نازار اۋداردى

فوتو: اقوردا

مەملەكەت باسشىسى «بارىس» حوككەي كلۋبىنىڭ بالالار مەن جاسوسپىرىمدەر كومانداسى ويىنشىلارىنىڭ اتا-انالارىنىڭ شاعىمىنا نازار اۋداردى.

بۇل تۋرالى 11 ساۋىردە قر پرەزيدەنتىنىڭ كەڭەسشىسى-ءباسپاسوز حاتشىسى رۋسلان جەلدىباي مالىمدەدى, دەپ حابارلايدى qandastar.kz

ول اتا-انالار حاتتا قارجىلىق جانە ۇيىمداستىرۋشىلىق ماسەلەلەرگە بايلانىستى قازاقستانداعى بالالار حوككەيىنىڭ كەلەشەگىنە الاڭداۋشىلىقتارىن جەتكىزگەنىن ايتادى. ولار اتالعان ماسەلەگە كلۋبتىڭ قازىرگى باسشىلىعى كوز جۇما قاراعانىن, سوندىقتان پرەزيدەنتتىڭ وسى ىسكە ارالاسۋىن سۇراعان.

«قاسىم-جومارت توقاەۆ اتالعان ماسەلەگە وراي جاۋاپتى ورگاندارعا تاپسىرما بەردى. ناتيجەسىندە «بارىس» حوككەي كلۋبىنىڭ تاربيەلەنۋشىلەرىن رەسەيدىڭ وسى ماۋسىمداعى چەمپيوناتىنا قاتىستىرۋ جۇمىستارى قولعا الىندى. شاعىمدا كوتەرىلگەن ماسەلەلەردىڭ ءبارى, سونىڭ ىشىندە كلۋبتىڭ وتاندىق جانە شەتەلدىك ويىنشىلار, جاتتىقتىرۋشىلار, باسقا دا ۇيىمدار الدىنداعى قارجىلىق مىندەتتەمەلەرى بيۋدجەت شىعىندارىن وڭتايلاندىرۋ ارقىلى شەشىمىن تاپتى», دەپ جازدى رۋسلان جەلدىباي Telegram-داعى ارناسىندا.

كلۋبتاعى قارجىلىق جاعدايدىڭ ناشارلاۋىنا كىنالى لاۋازىمدى تۇلعالارعا قاتىستى ءتيىستى شارا قابىلداندى.

بۇعان دەيىن شىمكەنتتە جۇمىس ساپارىمەن جۇرگەن مەملەكەت باسشىسى قاسىم-جومارت توقاەۆتىڭ №2 وقۋشىلار سارايىنا بارعانىن جازعانبىز.