Prezıdent «Barys» hokkeı klýbyna qatysty shaǵymǵa nazar aýdardy

Foto: Aqorda

Memleket basshysy «Barys» hokkeı klýbynyń balalar men jasóspirimder komandasy oıynshylarynyń ata-analarynyń shaǵymyna nazar aýdardy.

Bul týraly 11 sáýirde QR Prezıdentiniń keńesshisi-baspasóz hatshysy Rýslan Jeldibaı málimdedi, dep habarlaıdy qandastar.kz

Ol ata-analar hatta qarjylyq jáne uıymdastyrýshylyq máselelerge baılanysty Qazaqstandaǵy balalar hokkeıiniń keleshegine alańdaýshylyqtaryn jetkizgenin aıtady. Olar atalǵan máselege klýbtyń qazirgi basshylyǵy kóz juma qaraǵanyn, sondyqtan Prezıdenttiń osy iske aralasýyn suraǵan.

«Qasym-Jomart Toqaev atalǵan máselege oraı jaýapty organdarǵa tapsyrma berdi. Nátıjesinde «Barys» hokkeı klýbynyń tárbıelenýshilerin Reseıdiń osy maýsymdaǵy chempıonatyna qatystyrý jumystary qolǵa alyndy. Shaǵymda kóterilgen máselelerdiń bári, sonyń ishinde klýbtyń otandyq jáne sheteldik oıynshylar, jattyqtyrýshylar, basqa da uıymdar aldyndaǵy qarjylyq mindettemeleri bıýdjet shyǵyndaryn ońtaılandyrý arqyly sheshimin tapty», dep jazdy Rýslan Jeldibaı Telegram-daǵy arnasynda.

Klýbtaǵy qarjylyq jaǵdaıdyń nasharlaýyna kináli laýazymdy tulǵalarǵa qatysty tıisti shara qabyldandy.

Buǵan deıin Shymkentte jumys saparymen júrgen Memleket basshysy Qasym-Jomart Toqaevtyń №2 Oqýshylar saraıyna barǵanyn jazǵanbyz.