Prezıdent bızneske kedergi keltiretinderge qatań eskertý jasady

Qazaqstan basshysy «ulttyq býrjýazııany» barynsha qoldaýǵa, jónsiz tekseris júrgizgenderdi qatań jazalaýǵa shaqyrdy.
Qasym-Jomart Toqaev Qazaqstanda bızneske kedergi keltirgen memlekettik organdardyń jazalanýy kerek ekenin aıtty.

«Bıznestiń ári qaraı damýyna kedergi jasaıtyn memlekettik organdar men olardyń basshylarynyń áreketin qylmysqa teńeıtin ýaqyt keldi. Kóptegen memlekettegideı osy azamattarǵa qatysty zańnamada qatań shara qarastyryp, qylmystyq qýdalaýǵa deıin aparǵan durys», — dedi Toqaev úkimettiń keńeıtilgen otyrysynda.

Ári qaraı ol ulttyq bıznesti barynsha qoldaý qajet ekenine toqtaldy. Aldaǵy ýaqytta jónsiz tekseris júrgizip, baqylaý uıymdastyratyndardyń qatań túrde jazalanatynyn eskertti.

«Bıznestiń damýyna kedergi keltiretin sheneýnikter túrmege jabylady. Úkimetke zańnamaǵa ózgeris engizýdi tapsyramyn», — dedi Toqaev.

Esterińizge sala ketsek, Qasym-Jomart Toqaev qorǵanys mınıstrine qatań sógis jarııalaǵan bolatyn.