Prezıdent Qasym-Jomart Toqaev Kóshpendiler oıyndaryn «ashyq» dep jarııalady

Foto: World Nomad Games 2024

Memleket basshysy Qasym-Jomart Toqaev 5 Dúnıejúzilik kóshpendiler oıyndaryn resmı túrde ashyp berdi, dep habarlaıdy Halyq Uni.

Ashylý rásiminde sóz sóılegen prezıdent Qasym-Jomart Toqaev kóshpendiler órkenıetiniń dúnıe júzi tarıhynda óshpes iz qaldyrǵanyna erekshe toqtaldy. Uly dala kóshpendileri ejelden baıtaq Eýrazııany meken etkenin, jahandyq damý júıesine túbegeıli ózgeris ákelgenin, sol zamandaǵy ozyq tehnologııanyń ıesi bolǵanyn atap ótti.

Kóshpendiler 5 myń jyl buryn jylqyny qolǵa úıretti. Dúnıeni dúbirletken salt attylar mádenıetin qalyptastyrdy. Qýatty qarý-jaraq pen ǵajaıyp zergerlik buıymdar jasap shyǵardy. Saq dáýiriniń Altyn adamdary sonyń aıqyn dáleli. Qazaq jerinen ál-Farabı, Qoja Ahmet Iassaýı syndy ǵulamalar shyqqan. Olar álem ǵylymynyń damýyna orasan zor úles qosty. Bizdiń babalarymyz alyp memleketter qurdy, úlken qalalar saldy. Uly dalada Otyrar, Túrkistan, Taraz, Saraıshyq sııaqty sáýletti shaharlar boı kóterdi. Kóshpendi jurt batys pen shyǵysqa úlgi bolyp, túrli mádenıettiń jaqyndasýyna áser etti. Osy jerde ejelgi Ǵun ımperııasy, odan soń Túrik qaǵanaty saltanat qurdy. Olardyń dańǵyl jolyn Altyn Orda men Qazaq handyǵy jalǵastyrdy. Kóshpendilerdiń mádenıeti, rýhanı qazynasy, qundylyqtary ortaq, – dedi Memleket basshysy.

Sondaı-aq, Kóshpendiler oıyndary ulttyq sport túrlerinen ótetin álemdegi eń iri doda ekenin ári ony «Kóshpendiler Olımpıadasy» deýge bolatynyn erekshe aıtty.

Uly dala dúbiri elimiz úshin tarıhı oqıǵa. Saryarqanyń saıyn dalasy 5 kún boıy dúbirge tolady. Kúlli álem jurty naǵyz kóshpendilerdiń bolmysyna kýá bolady. Bul birlik pen tatýlyqtyń toıy. 5-shi Dúnıejúzilik kóshpendiler oıyndaryn ashyq dep jarııalaımyn, dedi – Qasym-Jomart Toqaev.

DKO uıymdastyrý komıtetiniń tóraǵasy Roman Sklıar álemniń 20 memleketinen kelgen 1600 volonterǵa alǵysyn bildirdi. Al Dúnıejúzilik etnosport konfederaııasynyń prezıdenti Bilál Erdoǵan Qazaqstannyń úlken sý tasqynyn bastan ótkergenin, biraq bul tabıǵı apatty abyroımen jeńip, dástúrli oıyndardy oıdaǵydaı uıymdastyrýǵa kóp kúsh jumsaǵanyn atap ótti.

Dúnıejúzilik etnosport konfederaııasy retinde biz dástúrli sport túrlerin búkil álemge taratýǵa baǵyttalǵan jańashyl kúsh-jigerdiń bir bóligimiz. Bes qurlyqta, 22 elde 32 múshesi bar bul sport túrleri tek saıysty ǵana bildirmeıdi. Olar sonymen qatar, bizdiń mádenı baılyǵymyzdyń, dostyǵymyzdyń jáne yntymaqtastyǵymyzdyń belgisi. Biz dástúrli sport túrleriniń ınstıtýttandyrylýyn erekshe baǵalaımyz jáne tilderimizdegi, ıdeıalarymyzdaǵy, jumystarymyzdaǵy úndestikti qasterleımiz, – dedi ol.

«Astana Arena» stadıonynda ótken sharaǵa О́zbekstan Prezıdenti Shavkat Mırzııoev, Qyrǵyzstan Prezıdenti Sadyr Japarov, Túrikmenstan Halk Maslahatynyń tóraǵasy Gýrbangýly Berdimuhamedov, Tatarstan Respýblıkasynyń Raısy Rýstam Mınnıhanov, Saha Respýblıkasynyń basshysy Aısen Nıkolaev, Mońǵolııanyń burynǵy prezıdenti Enhbaıar Nambaryn, Dúnıejúzilik etnosport konfederaııasynyń prezıdenti Bilál Erdoǵan, sondaı-aq IýNESKO, AО́SShK, BUU Dúnıejúzilik týrızm uıymy, Túrki memleketteri uıymy, TÚRKSOI, Túrki ınvestıııalyq qory, Túrki memleketteriniń Parlamenttik assambleıasy, Islam sport qaýymdastyǵy, Azyq-túlik qaýipsizdigi jónindegi Islam uıymynyń basshylary, Eýropa Odaǵynyń Ortalyq Azııadaǵy arnaıy ókili jáne basqa da resmı tulǵalar qatysty.

Aıta keteıik, 5 Dúnıejúzilik kóshpendiler oıyndary 2024 jylǵy 8-13 qyrkúıek aralyǵynda Astanada ótedi. Oıyndar tujyrymdamasy úsh negizgi baǵytta aınalady: sport, mádenıet jáne ǵylym, barlyǵy 21 básekege qabiletti sport túrin qamtıdy. Aldyn ala baǵalaýlar boıynsha, Astanaǵa 100-den astam elden 3000-ǵa jýyq qatysýshy sporttyq arenalarda da, mádenı jáne ǵylymı baǵdarlamalarda da 7 kúndik jarystarǵa qatysý úshin keledi. 21 oıyn túrinen jarys Astananyń úzdik sport alańdarynda ótedi. Olardyń ishinde: at jarysy, ulttyq kúres túrleri, dástúrli ıntellektýaldy oıyndar, shyǵys jekpe-jeginen jarystar, dástúrli sadaq atý, ulttyq ań aýlaý túrleri, at jarysy, halyq oıyndary. Oıyndarda 97 medal jıyntyǵy talasqa túsedi.

Búgingi ashylý saltanatyn elimizdiń «Qazaqstan», «Qazsport», «Habar», «El arna», «Jibek joly», «Silk Way», «Sport Plus» arnalarymen qatar, Túrkııanyń TRT AVAZ arnasy, Qyrǵyzstannyń 5 telearnasy, halyqaralyq «Mır», «Mır 24» arnalary, Reseıdiń «Start LIVE» sport arnasy, Tatarstannyń «TNV Qazan» telearnasy, О́zbekstan men Túrkimenstannyń memlekettik arnalary tikeleı efırde kórsetti. Kóshpendiler oıyndary tarıhynda mundaı halyqaralyq deńgeıde aýqymdy telehabar taratý birinshi ret qolǵa alynyp otyr.