پرەزيدەنت قازاقستاندىقتاردى جاڭا جىل مەرەكەسىمەن قۇتتىقتادى

فوتو: اقوردا

مەملەكەت باسشىسى قاسىم-جومارت توقاەۆ قازاقستان حالقىن جاڭا جىل مەرەكەسىمەن قۇتتىقتادى, دەپ حابارلايدى qandastar.kz اقپارات پورتالى.

«قىمباتتى وتانداستار!

سىزدەردى جاڭا جىل مەرەكەسىمەن شىن جۇرەكتەن قۇتتىقتايمىن!

بۇگىن ءبارىمىز جۇزجىلدىقتىڭ شيرەك عاسىرلىق بەلەسىنە قادام باسقالى تۇرمىز. بيىل التاي مەن اتىراۋ اراسىنداعى بارشا جۇرت تاريحتىڭ جاڭا پاراعىن ءبىر مەزەتتە اشادى. حالقىمىز ەكى جىلدىڭ توعىسار تۇسىن ىزگى نيەتپەن, ەرەكشە كوڭىل-كۇيمەن كۇتەدى. وتكەن كۇندەردى سارالاپ, ەسكى جىلعا باعا بەرەدى. ارمان-ماقساتىن ايقىنداپ, بولاشاققا ۇلكەن ۇمىتپەن قارايدى. بۇل – ناعىز وتباسىلىق مەرەكە. سوندىقتان مەن بارشاڭىزعا, ەڭ الدىمەن, ەلىمىز امان, جۇرتىمىز تىنىش, باۋىرىمىز ءبۇتىن بولسىن دەگىم كەلەدى.

ۇلۋ جىلى ۇلتىمىز ءۇشىن ماڭىزدى وقيعالارعا تولى بولدى. ءتۇرلى سالاداعى رەفورمالار جەمىسىن بەرە باستادى. ەكونوميكانىڭ جاڭا باعدارىن بەلگىلەپ, ناقتى شارالاردى قولعا الدىق. وڭدەۋ ونەركاسىبى قارقىندى دامۋدا. بىرقاتار ءىرى ءوندىرىس ورنى اشىلدى. ينۆەستيتسيالىق احۋال جاقساردى. مىڭداعان شاقىرىم جول سالىنىپ, جوندەلدى. ەلىمىزدەگى ەڭ ۇزىن كوپىردىڭ قۇرىلىسى اياقتالىپ, حالىق يگىلىگىنە بەرىلدى.

ديقاندارىمىز مول استىق جيناپ, قامبانى دانگە تولتىردى. «تازا قازاقستان» اكتسياسىنىڭ اياسىندا قالالار مەن اۋىلدار جاڭاشا كەلبەتكە يە بولا باستادى. العاش رەت ازاماتتارىمىزدىڭ ورتاشا ءومىر ءسۇرۋ ۇزاقتىعى 75 جاسقا جەتتى.

وسكەلەڭ ۇرپاقتىڭ جارقىن بولاشاعى ءۇشىن اۋقىمدى جۇمىس اتقارىلىپ جاتىر. ۇلتتىق قورداعى قارجىنىڭ ءبىر بولىگى بالالاردىڭ ەسەپشوتىنا ءتۇستى. جۇزدەن استام جاڭا مەكتەپ اشىلدى. كوپتەگەن الەۋمەتتىك نىسان سالىندى.

پارلامەنت دەپۋتاتتارى قوعامداعى وزەكتى ماسەلەلەر بويىنشا زاڭدار قابىلدادى. سونداي-اق بيىل ءبىز ەلىمىزدىڭ كەلەشەگىنە ايرىقشا اسەر ەتەتىن وتە ماڭىزدى شەشىم قابىلدادىق. اتوم ەلەكتر ستانتسياسىنا قاتىستى رەفەرەندۋم وتكىزدىك. كوپشىلىك بۇل باستاماعا قولداۋ ءبىلدىردى.

قازاقستاننىڭ الەمدىك ارەناداعى ابىرويى ارتا ءتۇستى. استانادا بەدەلدى حالىقارالىق ۇيىمداردىڭ ماڭىزدى سامميتتەرى ءوتتى.

دۇنيەجۇزىلىك كوشپەندىلەر ويىندارىنا مىڭداعان سپورتشىلار مەن مەيماندار كەلدى. بايراقتى باسەكەنى تابىستى ۇيىمداستىرىپ, ءتول وركەنيەتىمىزدى جەر جۇزىنە تانىتتىق. سپورتشىلارىمىز وليمپيادا جانە پاراليمپيادا ويىندارىندا كوك تۋىمىزدى بيىكتە جەلبىرەتتى. وقۋشىلارىمىز ءتۇرلى ءبىلىم سايىستارىنان جۇلدەلى ورالدى. باسقا دا كوپتەگەن تابىس بار.

بيىل كوكتەمدە بىرقاتار ايماقتا الاپات تاسقىن بولعانىن بىلەسىزدەر. تابيعاتتىڭ توسىن سىناعى بارىمىزگە اۋىر تيگەنى ءسوزسىز. سوعان قاراماستان, قيىن كۇندەردە حالقىمىز ءبىر-بىرىنە جاناشىر بولىپ, مىزعىماس بىرلىگىن كورسەتتى. زارداپ شەككەن بارشا ازاماتقا جان-جاقتى كومەك بەرىلدى. مەملەكەت ەشكىمدى نازاردان تىس قالدىرعان جوق. بارلىق مىندەتتەمەسىن تولىق ورىندادى. جۇزدەگەن وتباسى جاڭا جىلدى جاڭا شاڭىراقتا قارسى الىپ جاتىر. ءبىز وسىلايشا ىرىستى ىنتىماعىمىزدىڭ ارقاسىندا بارلىق قيىندىقتى ەڭسەرەمىز. العا سەنىممەن قادام باسامىز. جۇيەلى رەفورمالار ودان ءارى جالعاسادى. جوسپارىمىزدىڭ ءبارى ويداعىداي ورىندالادى. الداعى جىل بۇدان دا تابىستى بولادى. مەن پرەزيدەنت رەتىندە بۇعان بار كۇش-جىگەرىمدى سالامىن.

ۇكىمەت ءتيىمدى جۇمىس اتقارىپ, ەكونوميكانىڭ قارقىندى ءوسىمىن قامتاماسىز ەتۋگە ءتيىس.  جاڭا ءوندىرىس ورىندارىن اشىپ, بيزنەسكە قولايلى جاعداي جاساۋ قاجەت. جول سالۋدى جالعاستىرىپ, كوممۋنالدىق سالاداعى تۇيتكىلدى ماسەلەلەردى شەشۋ كەرەك. تسيفرلىق تەحنولوگيالاردى, سونىڭ ىشىندە جاساندى ينتەللەكتىنى قولدانۋ اياسىن كەڭەيتكەن ءجون. اۋىل ەڭبەككەرلەرىن بارىنشا قولداۋ ماڭىزدى. باستى ماقساتىمىز – ازاماتتاردىڭ ءال-اۋقاتىن ارتتىرۋ.

مەملەكەت ءبىلىم بەرۋ جانە دەنساۋلىق ساقتاۋ, عىلىم جانە مادەنيەت سالالارىن دامىتۋعا باسا ءمان بەرەدى.

ءبىز جاڭا مەكتەپتەر مەن اۋرۋحانالار سالىپ, پەداگوگتەردىڭ, دارىگەرلەردىڭ, عالىمدار مەن مادەنيەت قايراتكەرلەرىنىڭ مارتەبەسىن كوتەرە بەرەمىز. جاستارعا دا مىندەتتى تۇردە قولداۋ كورسەتەمىز.

كەلەسى جىلى ەلىمىزدە بىرنەشە ايتۋلى وقيعا بولادى. ءبىز ۇلى جەڭىستىڭ 80 جىلدىعىن لايىقتى اتاپ وتەمىز. اتا زاڭىمىزدىڭ جانە قازاقستان حالقى اسسامبلەياسىنىڭ وتىز جىلدىق مەرەيتويلارىن جوعارى دەڭگەيدە وتكىزەمىز. سونداي-اق ۇلى ابايدىڭ 180 جىلدىق مەرەيتويىن لايىقتى اتاپ ءوتۋىمىز كەرەك.

مەن الداعى جىلدى «جۇمىسشى ماماندىقتار جىلى» دەپ جاريالادىم. بۇل – ەڭبەك ادامدارىنا دەگەن ەرەكشە قۇرمەتتىڭ بەلگىسى. ءبىز وتانشىلدىق, ەڭبەكقورلىق جانە بىلىكتىلىككە ايرىقشا ءمان بەرەمىز. ءدال قازىر مەرەكەگە قاراماستان مىڭداعان وتانداسىمىز جۇمىس ىستەپ جاتىر. ولاردىڭ اراسىندا شەكاراشىلار, دارىگەرلەر, ءتارتىپ ساقشىلارى, قۇتقارۋشىلار مەن ءورت سوندىرۋشىلەر, ءوندىرىس باسىنداعى ماماندار جانە باسقا دا ازاماتتار بار. مۇنى ءوز ىسىنە دەگەن ادالدىقتىڭ ناعىز ۇلگىسى دەۋگە بولادى. مەن بۇكىل حالقىمىزدىڭ اتىنان سىزدەرگە شىنايى ريزاشىلىعىمدى بىلدىرەمىن. شەتەلدە ءبىلىم الىپ جاتقان نەمەسە جۇمىس ىستەپ جۇرگەن ازاماتتارىمىزعا اماندىق تىلەيمىن!

قادىرلى اعايىن!

وسى مەرەكەلىك ساتتە مەن ءار شاڭىراققا شاتتىق تىلەيمىن! جاڭا جىل ءار ازاماتقا جاقسىلىق اكەلسىن! ءتورت قۇبىلامىز تۇگەل بولسىن! ارداقتى انالارىمىز بەن ارداگەرلەرىمىز امان بولسىن! جاس ۇرپاقتىڭ جولى اشىق, بولاشاعى جارقىن بولسىن! قاستەرلى وتانىمىز ءوسىپ-وركەندەي بەرسىن! جاڭا جىلدا بارشاڭىزعا اماندىق, باق-بەرەكە تىلەيمىن!

ءار ۇيدە قۋانىش كوپ بولسىن! سىزدەرگە مىقتى دەنساۋلىق تىلەيمىن! ىرىس-نەسىبەلەرىڭىز ارتا بەرسىن!

جاڭا جىل قۇتتى بولسىن!», – دەدى قازاقستان پرەزيدەنتى