جاڭالىقتار
پرەزيدەنت «قازمۇنايگاز» كومپانياسىنىڭ توراعاسىن قابىلدادى
فوتو: اقوردا
مەملەكەت باسشىسى «قازمۇنايگاز» ۇك» اق باسقارما توراعاسى اسحات حاسەنوۆتى قابىلدادى, دەپ جازدى qandastar.kz
پرەزيدەنتكە ۇلتتىق كومپانيانىڭ بىلتىر اتقارعان جۇمىسى جونىندە ەسەپ بەرىلدى:
- «قازمۇنايگاز» كومپانيالار توبى وتكەن جىلى مۇناي جانە كوندەنسات ءوندىرۋ كولەمىن 23,8 ميلليون تونناعا جەتكىزدى. بۇل – 2023 جىلعى كورسەتكىشپەن سالىستىرعاندا 1,3 پايىزعا ارتىق;
- مۇناي ءوندىرۋ دەڭگەيىن ساقتاپ تۇرۋ ءۇشىن تەحنولوگيالىق سىن-قاتەرلەر باعدارلاماسى ىسكە اسىرىلىپ جاتىر. جوبا ءاربىر كەن ورنىنداعى مۇناي ءوندىرۋ كولەمىن ارتتىرۋدا سارالانعان ادىستەردى قولدانۋدى قاراستىرادى;
- قالامقاس-تەڭىز جوباسىن جوبالاۋ باستالدى, ونىڭ قۇنى قۇنى – 6,4 ميلليارد دوللار;
- وتكەن جىلى تورعاي پالەوزوي, قاراتون پودسولەۆوي, قاراجار جانە تايسويعان ۇڭعىمالارىندا بۇرعىلاۋ جۇمىستارى باستالدى. ولاردىڭ مۇناي قورى 800 ميلليون توننادان اسادى.
سونداي-اق, اسحات حاسەنوۆ بىلتىر مۇناي تاسىمالداۋ كولەمى 2023 جىلمەن سالىستىرعاندا 4 پايىزعا ارتىپ, 83,6 ميلليون توننانى قۇراعانىن ايتتى.
«2024 جىلى وتاندىق مۇناي وڭدەۋ زاۋىتتارىندا 17,44 ميلليون توننا مۇناي وڭدەلدى. ىشكى نارىقتى قامتاماسىز ەتۋ ءۇشىن جەڭىل مۇناي ونىمدەرى ءوندىرىسىن 2023 جىلمەن سالىستىرعاندا 370 مىڭ تونناعا ۇلعايتۋ شارالارى قابىلداندى», – دەدى كومپانيا توراعاسى.
اسحات حاسەنوۆتىڭ ەسەبىنەن:
- «CASPI BITUM» جاۋاپكەرشىلىگى شەكتەۋلى سەرىكتەستىگىندە بيتۋم ءوندىرىسىن جىلىنا 750 مىڭ تونناعا دەيىن ارتتىرۋ بويىنشا جوبا قولعا الىنعان;
- پوليەتيلەن وندىرەتىن زاۋىتتىڭ قۇرىلىس جۇمىستارى باستالعانىن ايتتى. قۇنى 7,4 ميلليارد دوللارعا باعالانعان كاسىپورىن جىلىنا 1 ميلليون 250 مىڭ توننا ءونىم شىعارا الادى;
- ماڭعىستاۋ وبلىسىندا سۋ تۇشىتۋ زاۋىتى سالىنىپ جاتىر. بۇل كاسىپورىن جاڭاوزەن قالاسىنىڭ تۇرعىندارىن ساپالى اۋىز سۋمەن قامتاماسىز ەتەدى. سونداي-اق قۋاتى 247 مۆت بولاتىن گيبريدتى ەلەكتر ستانتسياسىنىڭ قۇرىلىسى جۇرگىزىلىپ جاتىر;
كەزدەسۋ سوڭىندا پرەزيدەنت گەولوگيالىق بارلاۋ جۇرگىزۋگە, ءىرى ينۆەستيتسيالىق جوبالاردى جۇزەگە اسىرۋعا جانە مۇناي-گاز حيمياسىن دامىتۋعا قاتىستى جۇمىستى جۇيەلى جالعاستىرۋدى تاپسىردى.
