Prezıdent QMA tóraǵasyn qabyldady

Qasym-Jomart Toqaevqa Agenttik qyzmetiniń negizgi nátıjeleri týraly esep berilip, aldaǵy kezeńge arnalǵan mindetteri tanystyryldy, dep habarlaıdy qandastar.kz

Prezıdentke aqshany jylystatýǵa qarsy is-qımyl boıynsha qabyldanǵan sharalar jóninde baıandaldy. Vedomstvo 24 mıllıard teńgeden astam qarjyny qolma-qol aqshaǵa aınaldyrǵan jalǵan kompanııalardy áshkerelep, esirtki satýdan jáne alaıaqtyqtan túsken tabystardy jylystatqan 20 zańsyz krıptobırja qyzmetin toqtatqan. Sondaı-aq TMD aýmaǵyndaǵy eń iri krıptoservıs joıyldy. Ol 20 Darknet alańymen jumys istep, 200-den astam «narkoshopty» qamtyǵan. 9,7 mıllıon dollarǵa teń vırtýaldy aktıvter buǵattaldy.

Prezıdentke Qarjylyq monıtorıng agenttigi 720 qylmystyq isti tergeýdi aıaqtap, 15 uıymdasqan qylmystyq topty, sonyń ishinde 3 transulttyq topty joıǵany jóninde aqparat berildi. Budan bólek, 17,1 mıllıard teńge somasyndaǵy munaı ónimderin zańsyz shyǵarý áreketi toqtatyldy, zańsyz temeki ónimderin daıyndaǵan 2 jasyryn eh jáne sýrrogat alkogol ónimderin óndiretin 16 eh áshkerelendi. Kóleńkeli aınalymnan 12 mıllıard teńgege baǵalanǵan veıpter alyndy. Jalpy quny 164 mıllıard teńge bolatyn 63 ınfraqurylymdyq jobadaǵy bıýdjet qarjysynyń maqsatsyz jumsalýy jáne aýyl sharýashylyǵy salasyndaǵy 11 mıllıard teńgeniń sýbsıdııalaryn tıimsiz ıgerý derekteri toqtatyldy. Biryńǵaı jınaqtaýshy zeınetaqy qorynan jalǵan stomatologııalyq qyzmet kórsetý arqyly 200 mıllıard teńgeni zańsyz shyǵarý faktileri anyqtaldy.

Janat Elımanov azamattardyń qarjylyq múddelerin qorǵaý baǵytynda qabyldanǵan sharalar týraly áńgimeledi. Zańsyz mıkronesıe berý derekteri boıynsha 23 tergeý isi bastaldy. Onyń shyǵyny 71 mıllıard teńgeni quraıdy. 300 myńnan asa qaryz alýshynyń bereshegin qaıtarý jáne esepten shyǵarý jumysy júrgizilýde, 112 myńnan astam azamatty tartqan 45 qarjy pıramıdasy taratyldy, alaıaqtyq jobalar men qumar oıyndarǵa qatysy bar 31,5 myń saıt pen silteme buǵattaldy.

Kezdesý sońynda Memleket basshysy vedomstvo qyzmetiniń basty baǵyttary boıynsha birqatar tapsyrma berdi.