پرەزيدەنت قورعانىس مينيسترىنە اسكەري قىزمەتتىڭ قاۋىپسىزدىگىن قامتاماسىز ەتۋدى تاپسىردى

پرەزيدەنت – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆقا قورعانىس ۆەدومستۆوسىنىڭ 2025 جىلدىڭ ءبىرىنشى جارتىجىلدىعىندا اتقارعان قىزمەتى تۋرالى باياندالدى, دەپ حابارلايدى qandastar.kz

مەملەكەت باسشىسىنا ارميانىڭ جاۋىنگەرلىك دايىندىعى, كوكتەمگى اسكەر قاتارىنا شاقىرۋ ناۋقانىنىڭ ناتيجەلەرى, اسكەري-پاتريوتتىق تاربيە جۇيەسىن جەتىلدىرۋ جانە اسكەري قىزمەتشىلەردى الەۋمەتتىك تۇرعىدان قامسىزداندىرۋ شارالارى جونىندە مالىمەت بەرىلدى.

داۋرەن قوسانوۆ پرەزيدەنت تاپسىرمالارىنىڭ ورىندالۋ بارىسىن جەتكىزدى. اتاپ ايتقاندا, مەملەكەت باسشىسىنا اسكەردىڭ ۇتقىرلىق دەڭگەيىن ارتتىرۋ, اۋە شابۋىلىنا قارسى قورعانىستى كۇشەيتۋ, اۋماقتىق اسكەر مەن ۇشقىشسىز ۇشاتىن اپپاراتتار بولىمشەسىن, اسكەري ينفراقۇرىلىمدى دامىتۋ, سونداي-اق قورعانىس سالاسىنداعى مەملەكەتتىك تاپسىرىستى ورنالاستىرۋ ماسەلەلەرى جونىندە اقپارات ۇسىنىلدى.

قاسىم-جومارت توقاەۆ مينيسترگە قارۋلى كۇشتەردىڭ اسكەري الەۋەتىن ودان ءارى ارتتىرۋ جونىندە بىرقاتار مىندەت جۇكتەدى. سونىمەن قاتار مەملەكەت باسشىسى اسكەري قىزمەتتىڭ قاۋىپسىزدىگىن قامتاماسىز ەتۋگە, اسكەري قىزمەتشىلەردىڭ جاراقات الۋ جانە جازىم بولۋ وقيعالارىنىڭ الدىن الۋعا باعىتتالعان كەشەندى شارالار قابىلداۋدىڭ ماڭىزدىلىعىنا نازار اۋداردى.