پرەزيدەنت مەديتسينا قىزمەتكەرلەرىن قۇتتىقتادى

مەملەكەت باسشىسى قاسىم-جومارت توقاەۆ مەديتسينا سالاسى قىزمەتكەرلەرىن ماراپاتتاۋ راسىمىندە ءسوز سويلەدى. پرەزيدەنت جينالعان قاۋىمدى مەديتسينا قىزمەتكەرى كۇنىمەن قۇتتىقتاپ, وسى مەرەكەگە وراي دارىگەرلەرمەن اقوردادا العاش رەت كەزدەسىپ وتىرعانىن ءارى بۇل جيىننىڭ ءمان-ماعىناسى ەرەكشە ەكەنىن اتاپ ءوتتى, دەپ جازادى qandastar.kz

– حالقىمىز ء«بىرىنشى بايلىق – دەنساۋلىق» دەپ بەكەر ايتپاعان. شىن مانىندە, ۇلت ساۋلىعى – ەلىمىز ءۇشىن اسا ماڭىزدى قۇندىلىق. الەمنىڭ «ەكىنشى ۇستازى» – ءال-فارابي مەديتسينانى ونەر دەپ باعالاعان. راسىندا, دارىگەر بولۋ – جۇرەكتىڭ ءىسى. بۇل – ەكىنىڭ ءبىرى اياق باسا بەرمەيتىن جۇگى اۋىر, كۇردەلى جۇمىس. مەديتسينا قىزمەتكەرلەرى – ۇلت ساۋلىعىنىڭ ساقشىلارى, ەڭ قادىرلى ماماندىق يەلەرى. اسىرەسە, جاھاندىق ىندەت, ياعني, كوۆيد كەزىندە بۇكىل ەل دارىگەرلەردىڭ ادال قىزمەتىنە كۋا بولدى. كۇردەلى كەزەڭدە مەديتسينا ماماندارى مىڭداعان ادامدى قۇتقارىپ قالدى. ءبىز ابزال جانداردىڭ تاباندى ەڭبەگىن باعالايمىز. ولاردىڭ قايسارلىعىن ماقتان تۇتامىز. ء«بىر ادامنىڭ ءومىرىن قۇتقارۋ بارشا ادامزاتتى قۇتقارۋمەن بىردەي». دارىگەرلەر وتا كەزىندە, اۋرۋحانا پالاتاسىندا كۇن سايىن ەرلىك جاسايدى دەسەك, ارتىق بولمايدى. جەدەل جاردەم كولىگىندە ادام ومىرىنە اراشا تۇسەتىن ساتتەر بولادى. سوندىقتان سىزدەر, قۇرمەتتى مەديتسينا قىزمەتكەرلەرى, بەيبىت كۇننىڭ باتىرلارى دەگەن اتقا لايىقسىزدار. مەن بارشا مەديتسينا ماماندارىنا زور ريزاشىلىعىمدى بىلدىرەمىن, – دەدى مەملەكەت باسشىسى.

قاسىم-جومارت توقاەۆ قازاق دارىگەرلەرى قاي كەزدە بولسىن, ەل مۇددەسىن بارىنەن بيىك قويا بىلگەنىن, ۇلت قايراتكەرلەرى حالەل دوسمۇحامەدوۆ پەن سانجار اسفەندياروۆتىڭ بەلگىلى دارىگەر بولعانىن, ولار حالقىمىزدىڭ ازاتتىعى ءۇشىن دە, ساۋلىعى ءۇشىن دە ايانباي كۇرەسكەنىن اتاپ ءوتتى.

– بۇگىندە ەلىمىزدىڭ دەنساۋلىق ساقتاۋ سالاسىندا 380 مىڭعا جۋىق ادام جۇمىس ىستەيدى. ءار ماماننىڭ ەڭبەگى وراسان زور. ۇلت ساۋلىعىن ساقتاۋعا بۇكىل ءومىرىن ارناعان تۇتاس اۋلەتتەر بار. الماتىداعى دجۋۆاشەۆتەر اۋلەتىنەن 13 ادام مەديتسينا سالاسىن تاڭداعان. ولاردىڭ جالپى ەڭبەك ءوتىلى – 375 جىل. ال اتىراۋ وبلىسىنداعى شاناەۆتار اۋلەتىنەن 16 دارىگەر شىققان. مۇنداي ەڭبەك ديناستيالارىنىڭ عيبراتتى جولى – كوپكە ۇلگى-ونەگە. قازىر ۇلتتىق مەديتسينا سالاسى قارقىندى دامىپ كەلە جاتىر. جەتىستىكتەرىمىز از ەمەس. ەلىمىزدە ورتاشا ءومىر ءسۇرۋ ۇزاقتىعى 75,4 جاسقا جەتتى. انا مەن بالا ءولىمى شامامەن 12 پايىزعا ازايدى. بەس جىلدا 800-گە جۋىق دەنساۋلىق ساقتاۋ نىسانى, ياعني, كوپتەگەن ەمحانا مەن اۋرۋحانا سالىندى. بۇل جۇمىس توقتامايدى, مەملەكەت الداعى ۋاقىتتا دا ينفراقۇرىلىمدى دامىتا بەرەدى. ۇلت ساۋلىعىن جاقسارتۋ العاشقى مەديتسينالىق كومەكتەن باستالادى. ەلىمىزدە اۋىلدىق جەردەگى مەديتسينا جۇيەسىن جاڭعىرتۋعا ارنالعان ۇلتتىق جوبا جۇزەگە اسىرىلىپ جاتىر. بۇگىندە 469 عيمارات بوي كوتەردى. جىل سوڭىنا دەيىن تاعى 186 نىسان سالىنادى. اۋداندىق اۋرۋحانالار زامانعا ساي قۇرالدارمەن جابدىقتالىپ جاتىر, – دەدى پرەزيدەنت.