Prezıdent medıına qyzmetkerlerin quttyqtady

Memleket basshysy Qasym-Jomart Toqaev medıına salasy qyzmetkerlerin marapattaý rásiminde sóz sóıledi. Prezıdent jınalǵan qaýymdy Medıına qyzmetkeri kúnimen quttyqtap, osy merekege oraı dárigerlermen Aqordada alǵash ret kezdesip otyrǵanyn ári bul jıynnyń mán-maǵynasy erekshe ekenin atap ótti, dep jazady qandastar.kz

– Halqymyz «Birinshi baılyq – densaýlyq» dep beker aıtpaǵan. Shyn máninde, ult saýlyǵy – elimiz úshin asa mańyzdy qundylyq. Álemniń «ekinshi ustazy» – Ál-Farabı medıınany óner dep baǵalaǵan. Rasynda, dáriger bolý – júrektiń isi. Bul – ekiniń biri aıaq basa bermeıtin júgi aýyr, kúrdeli jumys. Medıına qyzmetkerleri – ult saýlyǵynyń saqshylary, eń qadirli mamandyq ıeleri. Ásirese, jahandyq indet, ıaǵnı, kovıd kezinde búkil el dárigerlerdiń adal qyzmetine kýá boldy. Kúrdeli kezeńde medıına mamandary myńdaǵan adamdy qutqaryp qaldy. Biz abzal jandardyń tabandy eńbegin baǵalaımyz. Olardyń qaısarlyǵyn maqtan tutamyz. «Bir adamnyń ómirin qutqarý barsha adamzatty qutqarýmen birdeı». Dárigerler ota kezinde, aýrýhana palatasynda kún saıyn erlik jasaıdy desek, artyq bolmaıdy. Jedel járdem kóliginde adam ómirine arasha túsetin sátter bolady. Sondyqtan sizder, qurmetti medıına qyzmetkerleri, beıbit kúnniń batyrlary degen atqa laıyqsyzdar. Men barsha medıına mamandaryna zor rızashylyǵymdy bildiremin, – dedi Memleket basshysy.

Qasym-Jomart Toqaev qazaq dárigerleri qaı kezde bolsyn, el múddesin bárinen bıik qoıa bilgenin, ult qaıratkerleri Halel Dosmuhamedov pen Sanjar Asfendııarovtyń belgili dáriger bolǵanyn, olar halqymyzdyń azattyǵy úshin de, saýlyǵy úshin de aıanbaı kúreskenin atap ótti.

– Búginde elimizdiń densaýlyq saqtaý salasynda 380 myńǵa jýyq adam jumys isteıdi. Ár mamannyń eńbegi orasan zor. Ult saýlyǵyn saqtaýǵa búkil ómirin arnaǵan tutas áýletter bar. Almatydaǵy Djývashevter áýletinen 13 adam medıına salasyn tańdaǵan. Olardyń jalpy eńbek ótili – 375 jyl. Al Atyraý oblysyndaǵy Shanaevtar áýletinen 16 dáriger shyqqan. Mundaı eńbek dınastııalarynyń ǵıbratty joly – kópke úlgi-ónege. Qazir ulttyq medıına salasy qarqyndy damyp kele jatyr. Jetistikterimiz az emes. Elimizde ortasha ómir súrý uzaqtyǵy 75,4 jasqa jetti. Ana men bala ólimi shamamen 12 paıyzǵa azaıdy. Bes jylda 800-ge jýyq densaýlyq saqtaý nysany, ıaǵnı, kóptegen emhana men aýrýhana salyndy. Bul jumys toqtamaıdy, memleket aldaǵy ýaqytta da ınfraqurylymdy damyta beredi. Ult saýlyǵyn jaqsartý alǵashqy medıınalyq kómekten bastalady. Elimizde aýyldyq jerdegi medıına júıesin jańǵyrtýǵa arnalǵan ulttyq joba júzege asyrylyp jatyr. Búginde 469 ǵımarat boı kóterdi. Jyl sońyna deıin taǵy 186 nysan salynady. Aýdandyq aýrýhanalar zamanǵa saı quraldarmen jabdyqtalyp jatyr, – dedi Prezıdent.