پرەزيدەنت نازارباەۆ پەن ءپۋتيننىڭ نە ءۇشىن كەزدەسكەنىن ايتتى

«كەز كەلگەن ءداۋىردىڭ جاقسى جاعى دا, كولەڭكەلى تۇستارى دا بار. ءبىزدىڭ جاڭا تاريحىمىزدا جارقىن ساتتەر الدەقايدا كوپ بولدى. بۇل – اقيقات. سالىستىرمالى تۇردە العاندا, قىسقا مەرزىم ىشىندە مەملەكەتتىگىمىزدىڭ بەرىك تۇعىرى قالىپتاستى, بيلىك ينستيتۋتتارى قۇرىلدى, جاڭا استانامىز بوي كوتەردى, شەكارامىز شەگەندەلىپ, زاڭ جۇزىندە بەكىتىلدى. كوپتەگەن ەلمەن ءتيىمدى قارىم-قاتىناس ورناتىلدى, ەكونوميكاعا شەتەلدەن ينۆەستيتسيا تارتىلدى. وسى جەتىستىكتىڭ ءبارىن جوققا شىعارۋ دۇرىس بولماس ەدى. ءبىز ادىلەتتى مەملەكەت قۇرامىز دەسەك, تاريحقا دا, ونى جاساۋعا اتسالىسقان ازاماتتارعا دا ءادىل قاراۋىمىز كەرەك. مۇنىڭ ءبارى, تۇپتەپ كەلگەندە, ۇلتتىڭ بولاشاعى ءۇشىن قاجەت. وتكەندى وي ەلەگىنەن وتكىزىپ, ونى ءادىل ءارى شىنايى باعالاي الماساق, العا سەنىممەن قادام باسا المايمىز. ساياسي احۋالدىڭ ىقپالىمەن ءوز تاريحىڭدى كوپە-كورىنەۋ بۇرمالاي بەرۋگە بولمايدى. ەل شەجىرەسىن باسىنان باستاپ قايتا جازۋ ءتىپتى قاۋىپتى. ارينە, نۇرسۇلتان نازارباەۆ ۇزاق جىل بويى ەل تىزگىنىن ۇستاعان ۋاقىتتا كەمشىلىكتەر بولدى. بىراق ەشتەڭە ىستەمەگەن ادام عانا قاتەلەسپەيدى».قاسىم-جومارت توقاەۆ

توقاەۆ نازارباەۆ وتستاۆكاعا كەتكەنىمەن, قاۋىپسىزدىك كەڭەسىنىڭ توراعاسى بولىپ وتىرعان كەزدە ساياسي سىپايىلىقتى ساقتاي بەرمەيتىنىن ايتتى.

«ۇنەمى پرەمەر-ءمينيستردى, ۇلتتىق بانكتىڭ توراعاسىن, مينيسترلەردى, اكىمدەردى شاقىرىپ الىپ, جينالىس وتكىزەتىن. بۇعان ءوز ازاماتتارىمىزدى بىلاي قويعاندا, شەتەل باسشىلارى مەن ديپلوماتتارى دا تاڭدانا قارايتىن. «نازارباەۆ قىزمەتىنەن كەتكەن سوڭ ءتىپتى جوعارىلادى, ەندى پرەزيدەنت تە وعان باعىنادى» دەگەن ءازىل اڭگىمە دە پايدا بولدى. ال, شىن مانىندە, بۇل ازىلدەيتىن جاعداي ەمەس ەدى».قاسىم-جومارت توقاەۆ

مەملەكەت باسشىسىنىڭ سوزىنشە, بۇل جاعداي قوسارلانعان بيلىك تۋرالى الىپ قاشپا اڭگىمەنىڭ ورشۋىنە اكەپ سوقتى.

«شەنەۋنىكتەر دە كابينەتتەن كابينەتكە جۇگىرىپ, كىمنىڭ تاپسىرماسىن ورىندايتىنىن بىلمەي دال بولاتىن. ول از دەسەڭىز, كەيبىر شەنەۋنىكتەر «ەلباسى ينستيتۋتى پرەزيدەنت بيلىگىنەن جوعارى تۇرۋعا ءتيىس» دەپ, اقىلعا سىيمايتىن جاعدايدى زاڭ جۇزىندە نەگىزدەمەك بولدى. نۇرسۇلتان نازارباەۆتىڭ 2021 جىلعى قاراشادا وتكەن Astana Club جيىنىندا 92 جاستاعى ماحاتحير موحامادتى مىسالعا كەلتىرىپ, ءوزىنىڭ اقورداعا قايتىپ كەلۋى مۇمكىن ەكەنىن مالىمدەۋىن جانە بۇرىنعى پرەزيدەنتتىڭ سول جىلى جەلتوقسان ايىندا سانكت-پەتەربۋرگ قالاسىندا وتكەن تمد ەلدەرىنىڭ سامميتىنە قاتىسۋىن ناعىز بيلىك داعدارىسىنا اكەپ سوقتىرعان نەگىزگى وقيعالار دەۋگە بولادى. سونىڭ الدىندا عانا جەرگىلىكتى ءبىر ساياساتتانۋشى وعان «ەلباسىنىڭ التىن ءداۋىرىن» قالپىنا كەلتىرۋ ءۇشىن باتىل شارالار قابىلداۋ قاجەتتىگىن ايتىپ, ارانداتۋشىلىق مازمۇنداعى حات جولداعان ەدى».قاسىم-جومارت توقاەۆ

پرەزيدەنت قازىر پاراساتتىلىق تانىتىپ, نۇرسۇلتان نازارباەۆتىڭ قازاقستانعا سىڭىرگەن تاريحي ەڭبەگىن لايىقتى باعالاۋ كەرەك ەكەنىن اتاپ ءوتتى.

«مەن پرەزيدەنت رەتىندە مەملەكەت مۇددەسىن باسشىلىققا الۋعا, ەل بىرلىگىن بارىنەن بيىك قويۋعا مىندەتتىمىن. ءسىزدىڭ سۇراعىڭىزعا كەلسەك, قازىر ءبىز شامامەن ايىنا ءبىر رەت تەلەفون ارقىلى سويلەسىپ تۇرامىز», – دەدى ول.

توقاەۆ سونىمەن بىرگە جاقىندا نازارباەۆتىڭ ماسكەۋگە بارىپ, ۆلاديمير پۋتينمەن كەزدەسۋىنە دە قاتىستى پىكىر ءبىلدىردى.

«نۇرسۇلتان نازارباەۆ پەن ۆلاديمير ءپۋتيننىڭ جەلتوقسانداعى كەزدەسۋى وتكەن جىلداعى ەكىنشى جۇزدەسۋى عوي دەيمىن. كۇز باسىنداعى ءبىرىنشى كەزدەسۋ تۋرالى بۇقارالىق اقپارات قۇرالدارىندا ايتىلعان جوق. ولار بايىرعى دوستار ءارى ارىپتەستەر رەتىندە جۇزدەسەتىن بولسا كەرەك, ورتاق اڭگىمەلەرى دە بار شىعار. مۇنداي كەزدەسۋلەر ادەتتە نۇرسۇلتان ءابىش ۇلىنىڭ باستاماسىمەن وتەدى. ول ءۇشىن مۇنىڭ ماڭىزى زور. بۇرىنعى قازاق كسر مينيسترلەر كەڭەسىنىڭ توراعاسى, پارتيا باسشىسى جانە ەگەمەن قازاقستاننىڭ پرەزيدەنتى رەتىندە نۇرسۇلتان ءابىش ۇلىنىڭ كرەملمەن تىعىز مورالدىق جانە ساياسي بايلانىسى بارىن ەستەن شىعارماعان ءجون. ونىڭ تالاي ۋاقىتى ماسكەۋدە ءوتتى, سان مارتە ىسساپارعا باردى, سەزد جانە پلەنۋم وتىرىستارىنا قاتىستى, جۇمىس بابىمەن جانە رەسمي ساپارلارمەن دە بولدى».قاسىم-جومارت توقاەۆ