پرەزيدەنت سۋ كودەكسىنە قول قويدى

فوتو: baq.kz

پرەزيدەنت سۋ كودەكسىنە قول قويدى, دەپ جازدى qandastar.kz

ەلىمىزدە تاسقىن بولسا, ناقتى قاي ورگاننىڭ نەمەن اينالىساتىنى ايقىندالدى. بىلتىرعى توتەنشە جاعدايدان كەيىن, حالىقپەن قوسا, ابدىراعان ۇكىمەت وسى ماسەلەنى ءبىر جاقتى قىلىپ, سۋ كودەكسىنە ەنگىزىپتى. ەندى توتەنشە جاعداي تۋىنداسا, سۋ مينيسترلىگى — باسسەينگە تاسقىن سۋدى وتكىزىپ, قويمالالاردىڭ جاي كۇيىن باقىلايدى. توتەنشە جاعدايلار مينيسترلىگى — الدىن الىپ, سالدارىن جويادى.

اكىمدىكتەر — ەرىگەن قار سۋىنا قارسى بوگەت سالادى. جەرۇستى سۋ نىساندارىنا ساناتسيا جۇرگىزەدى. ال ەكولوگيا مينيسترلىگى — قاراماعىنداعى اۋماقتارعا اعاش وتىرعىزۋى ءتيىس.

بۇدان بولەك:  كودەكستىڭ ءبىرىنشى بلوگى سۋ ۇنەمدەۋدىڭ جاڭا تەتىكتەرىن ەنگىزۋگە جانە سۋ نىساندارىن قورعاۋعا باعىتتالعان. زاڭناماعا العاش رەت «سۋ قاۋىپسىزدىگى» ۇعىمى ەنگىزىلدى. بۇل ازاماتتار مەن ەل ەكونوميكاسىن سۋ تاپشىلىعىنان, ال سۋ نىساندارىن لاستانۋدان قورعاۋدى, سونداي-اق ترانسشەكارالىق سۋ نىساندارىن قورعاۋ مەن پايدالانۋ سالاسىندا قازاقستاننىڭ مۇددەسىنە قىزمەت ەتەدى.

ەكىنشى بلوك سالانى باسقارۋ تاسىلدەرىن قايتا قاراستىرادى. وندا سۋ رەسۋرستارىن قورعاۋدىڭ باسىم باعىتتارىنا, شەشىم قابىلداۋعا جۇرتشىلىقتى كەڭىنەن تارتۋعا جانە سۋ شارۋاشىلىعى باسسەيندەرى نەگىزىندە باسقارۋعا ءمان بەرىلگەن.  كەلەسى بلوكتا سۋ قورىن پايدالانۋ مەن قورعاۋ سالاسىنداعى مەملەكەتتىك رەتتەۋ جانە باقىلاۋ قاتاڭداتىلدى. باسسەيندىك سۋ ينسپەكتسيالارىنا مەملەكەتتىك باقىلاۋ فۋنكتسياسىنان بولەك, جەدەل ارەكەت ەتە وتىرىپ مەملەكەتتىك قاداعالاۋ جونىندەگى وكىلەتتىلىكتەر بەرىلدى.

سوڭعى بلوك گيدروتەحنيكالىق قۇرىلىستاردىڭ قاۋىپسىزدىگىن قامتاماسىز ەتۋگە باعىتتالعان.