الەم جاڭالىقتارى
پرەزيدەنت تۇرىكمەنستاننىڭ سىرتقى ىستەر ءمينيسترىن قابىلدادى
فوتو: Akorda
قاسىم-جومارت توقاەۆ استاناعا رەسمي ساپارمەن كەلگەن تۇرىكمەنستاننىڭ مينيسترلەر كابينەتى توراعاسىنىڭ ورىنباسارى, سىرتقى ىستەر ءمينيسترى راشيد مەرەدوۆپەن كەزدەستى, دەپ جازدى qandastar.kz
مەملەكەت باسشىسى قازاق-تۇرىكمەن قارىم-قاتىناستارى بارلىق باعىتتا دوستىق, تاتۋ كورشىلىك جانە ستراتەگيالىق سەرىكتەستىك رۋحىندا دامىپ كەلە جاتقانىنا نازار اۋداردى.
قازاقستان پرەزيدەنتى اشحاباد باستاماشى بولعان بەيبىتشىلىك جانە سەنىم جىلىنىڭ باستالۋىمەن قۇتتىقتادى. بۇل تۇرىكمەنستاننىڭ بەيتاراپ ساياسي ۇستانىمىنىڭ 30 جىلدىعىمەن قاتار كەلىپ وتىر.
قاسىم-جومارت توقاەۆ تۇرىكمەنستاننىڭ بىتىمگەرشىلىك باستامالارىنىڭ ماڭىزى زور ەكەنىن ايتىپ, ونى تابىستى جۇزەگە اسىرۋ ءۇشىن قازاقستاننىڭ جان-جاقتى قولداۋ كورسەتۋدى جالعاستىرا بەرەتىنىن اتاپ ءوتتى.
ەكى ەل اراسىندا ەكونوميكالىق بايلانىستار قارقىندى دامىپ, مەملەكەتتەر مۇددەسىنە ساي كەلەتىن وزەكتى ماسەلەلەر كونسترۋكتيۆتى تۇرعىدان ىلگەرىلەپ كەلەدى.
راشيد مەرەدوۆ مەملەكەت باسشىسىنا تۇرىكمەنستان پرەزيدەنتى سەردار بەردىمۇحامەدوۆ پەن تۇرىكمەن حالقىنىڭ ۇلتتىق كوشباسشىسى, حالك ماسلاحاتىنىڭ توراعاسى گۋربانگۋلى بەردىمۇحامەدوۆتىڭ ىستىق ىقىلاسىن جەتكىزدى
ءمينيستردىڭ ايتۋىنشا, قازاق-تۇرىكمەن ىقپالداستىعى ستراتەگيالىق سيپاتقا يە, سونىمەن قاتار بەرىك ءارى ۇزاقمەرزىمدى پەرسپەكتيۆاعا قۇرىلعان. وسى رەتتە تۇرىكمەن دەلەگاتسياسى اشحابادتىڭ استانامەن مەملەكەتارالىق بايلانىستاردىڭ بارلىق باعىتى بويىنشا ىنتىماقتاستىقتى ودان ءارى نىعايتۋعا نيەتتى ەكەنىن راستادى.
اڭگىمەلەسۋ بارىسىندا ەنەرگەتيكا, كولىك-ترانزيت جانە مادەني-گۋمانيتارلىق سالالار بويىنشا بۇعان دەيىن جوعارى دەڭگەيدە قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسى تالقىلاندى.
